Ċapċip… żfin u għajjat kbir minn folla kbira, l-aktar minn adoloxxenti u żgħażagħ li l-Erbgħa filgħaxija ħonqu kull rokna tal-Fosos tal-Florian għall-tnax-il edizzjoni tal-Isle of Mtv. Mal-ewwel noti tal-kanzunetta ta’ Dimitri Vegas…. When I grow up, il-folla dehret entużjasta bl-ispettaklu ta’ dan l-artist.
Il-folla laqgħet ukoll lill-ex attriċi u kantanta Amerikana Hailee Steinfeld li flimkien maż-żeffiena tagħha fuq il-palk spettakolari tal-Isle of MTV interpretat il-kanzunetta Love Myself li ddebutat biha fl-elfejn u ħmistax.
Matul il-kunċert il-kantanta Paloma Faith allegrat lill-pubbliku b’Lullaby waqt li Sigala u Elle Eyre interpretaw il-kanzunetta tas-sajf Came here for love. Id-dj issorprenda lill-folla meta laqa’ lill-mistiendna speċjali Fuse ODG fuq il-palk meta interpretaw il-kanzunetta Feels Like Home.
L-atmosfera fuq il-Fosos kompliet tikber bis-sehem ta’ Jason Derulo, iz-żeffiena tiegħu u l-effetti viżwali mill-isbaħ li laħqu l-qofol tagħhom waqt il-kanzunetta Tip Toe.
Fil-kunċert ħadu sehem ukoll l-artisti lokali Christabell u Emma Muscat.
Spikkaw fost l-eluf bosta barranin, uħud minnhom ġew Malta apposta għall-kunċert wara kampanja tal-Awtorita tat-Turiżmu. Miljuni oħra setgħu jsegwu dan l-ispettaklu li għall-ewwel darba xxandar ukoll f’għaxar pajjiżi differenti.
