Meta aktar kmieni dan is-sajf ħarġet l-ewwel sejħa għal dawk interessati li jsegwu kors fil-European Gaming Institue of Malta, istitut imwaqqaf b’kollaborazzjoni bejn l-Awtorità Maltija għalLogħob u l-MCAST, kienu 30 student li nkitbu sabiex jibdew jitħarrġu f ’dan il-qasam.
Dan kien żvelat fil-gazzetta Kulħadd, fejn intqal li għalkemm in-numru ta’ studenti jista’ jidher li mhux xi wieħed kbir, meta tqis li din hija l-ewwel sena, u anke l-opportunitajiet kbar li jeżistu fid-dinja tal-gaming, ħafna drabi b’persuni b’ċerti ħiliet jinħatfu mill-ewwel, dan huwa numru nkoraġġanti ħafna.
Id-dinja tal-gaming hija waħda volatili ħafna u l-fatt li se jkun hawn f’pajjiżna stess, istitut, li huwa wieħed mill-akbar ċentri għall-kumpaniji ta’ dan it-tip, li jagħti t-taħriġ b’mod professjonali, anke bit-tibdiliet li qed iseħħu permezz ta’ teknoloġiji ġodda bħalma hija l-blockchain, dan se jpoġġi lill-pajjiżna pass qabel pajjiżi oħra.
L-industrija tal-gaming kontinwament tfittex għal talent ġdid u l-korsijiet fi ħdan l-EGIM huma pont ideali bejn l-edukazzjoni u l-bżonnijiet tal-industrija.
Bħalissa hawn mas-700 post tax-xogħol vojt fi ħdan l-industrija tal-gaming, li hija stmata li se tkompli tikber fiż-żmien li ġej. Din mhix l-ewwel darba li l-MCAST għamel korsijiet apposta meta jkun ra d-domanda fis-suq taxxogħol, b’eżempju prattiku jkun dak fil-qasam talistampar meta kien hemm l-investiment tal-fabbrika Crane Currency li tistampa l-flus.
Ikkuntattjat mill-gazzetta Kulħadd, is-Segretarju Parlamentari għas-Servizzi Finanzjarji, Ekonomija Diġitali u Innovazzjoni Silvio Schembri fisser kif huwa kruċjali li l-Gvern ikompli jinkoraġġixxi aktar korsijiet ta’ taħriġ sabiex jiżdiedu l-ħiliet tal-istudenti u magħhom jiżdiedu wkoll l-opportunitajiet.
Schembri saħaq li n-niċċa ekonomika tal-gaming hija waħda importanti ferm għall-pajjiżna mhux biss għad-dħul finanzjarju iżda anke għan-numru ta’ postijiet tax-xogħol marbuta miegħu.
Fl-aħħar nett, is-Segretarju Parlamentari stqarr li dan il-Gvern qed jaħdem sabiex mhux biss isaħħaħ issetturi tal-ekonomija li issa ilhom magħna, bħal mhuwa l-gaming, iżda permezz ta’ teknoloġiji ġodda, bħal dik tal-blockchain, ikun jista’ joħloq aktar opportunitajiet anke fis-settur tal-gaming stess, billi din it-teknoloġija tagħti lok ta’ aktar esplorazzjoni ta’ metodi ġodda.
