Id-Deputat Nazzjonalista Karol Aquilina esiġa mingħand il-Kap tal-Partit, Bernard Grech, li jagħtih spjegazzjoni dwar l-allegazzjoni serja li għamel kontrih Jason Azzopardi.
Jason Azzopardi allega li, waqt ikla ma’ numru żgħir ta’ negozjanti, il-Kap Nazzjonalista Bernard Grech ittieħed f’ġenb minn żewġ persuni li huma qrib xi ħadd li għaddejj bi proċeduri kriminali b’rabta ma’ qtil.
Azzopardi allega li hemmhekk issemma s-suġġett ta’ proklama għall-allegat mandant fil-qtil ta’ Daphne Caruana Galizia, b’Bernard Grech jagħti assigurazzjoni li, li kieku kellu jkun Prim Ministru, ikun dispost jirrakkomanda l-għoti tal-proklama.
Karol Aquilina, li hu l-Kelliem tal-PN għall-Ġustizzja – portafoll li, meta ġie biex jagħmel ix-Shadow Cabinet tiegħu, Bernard Grech kien kostrett iċedi li jagħtihulu fuq insistenza anki ta’ nies qrib l-għaqda Repubblika – saħaq ma’ ONE News li huwa esiġa li jkollu spjegazzjoni mingħand Bernard Grech.
Karol Aquilina huwa Deputat magħruf li hu qrib ħafna ta’ Jason Azzopardi. Wara l-istess dikjarazzjoni ta’ Aquilina ma’ ONE News, nies li jkunu fid-Dar Ċentrali qalulna li ħadd ma tgħaddilu minn moħħu li Karol Aquilina aġixxa waħdu.
Dawn semmewlna lil Jason Azzopardi, u qalulna li Karol Aquilina esiġa spjegazzjoni mingħand Grech fuq il-kwistjoni tal-maħfra lil Yorgen Fenech fuq insistenza ta’ Jason Azzopardi nnifsu.
“Jason Azzopardi jaf fejn għandu jmur. Karol Aquilina jidħol kexxun f’dan kollu għax huwa widna u persuna ta’ fiduċja ta’ Azzopardi u żgur li l-istess Azzopardi talab lil Aquilina biex jagħmillu favur: dak li jitfa’ pressjoni fuq il-Kap u jitlob spjegazzjoni mingħandu,” saħqu s-sorsi tagħna.
Dwar l-istess ikla li fuqha qam ġlied ieħor ġdid fil-Partit Nazzjonalista, Jason Azzopardi kien saħaq ukoll li l-Kap tal-Partit Nazzjonalista ngħata donazzjoni ta’ flus għall-maratona tal-ġbir tal-fondi tal-Partit li saret ftit jiem biss wara.
L-ewwel darba li Bernard Grech qal li lest jagħti l-maħfra lil Yorgen Fenech kien proprju sena ilu, waqt intervista li kien għamillu Chris Peregin tal-portal Lovinmalta. Sussegwentement , Peregin spiċċa ġie ingaġġat biex jaħdem spalla ma’ spalla ma’ Grech u sar strateġista ewlieni tiegħu.
