Il-Gvern ħabbar li daħlu fis-seħħ emendi ġodda fil-Leġiżlazzjoni dwar is-Sigurtà tal-Ġugarelli, li jirregolaw l-ammont u t-tip ta’ sustanzi kimiċi permessi fil-ġugarelli.
Dan wara li l-Kabinett tal-Ministri, ftit tal-jiem ilu, approva dawn id-direttivi Ewropej fl-imsemmija leġiżlazzjoni.
Il-leġiżlazzjoni l-ġdida tistabbilixxi valuri ta’ limitu għall-anilina, fost oħrajn, li tħaddan fiha kimika, li meta tagħmel kuntatt mal-ġilda tal-bniedem tista’ tikkawża l-kanċer.
Ir-regoli l-ġodda jeħtieġu wkoll li jekk wieħed mill-61 sustanza allerġenika oħra jkunu preżenti fil-ġugarelli, dawn għandhom ikunu mniżżla fuq it-tikketta, l-ippakkjar, jew fuq il-fuljett inkluż.
Id-direttiva telenka wkoll 55 sustanza allerġenika li l-użu tagħhom fil-ġugarelli huwa pprojbit jew ristrett fl-Unjoni Ewropea.
F’konferenza tal-aħbarijiet iċ-Chairperson tal-Awtorità ta’ Malta għall-Kompetizzjoni u għall-Affarijiet tal-Konsumatur, l-Inġ. Helga Pizzuto ħeġġet lill-pubbliku biex ifittex il-marka CE fuq il-prodotti u biex jaqra kull tikketta ta’ twissija fl-ippakkjar bir-reqqa, meta jinxtara xi ġugarelli ġdid.
Hija qalet li n-negozjanti għandhom dejjem jiċċekkjaw mal-fornituri tagħhom li l-ġugarelli huma konformi mar-rekwiżiti imħabbra, qabel ma jixtru stokk ġdid.
“Is-sena li għaddiet biss għamilna l’fuq minn mitt spezzjoni, u bgħatna 44 prodott biex naraw li huma konformi mal-liġijiet u l-ispeċifikazzjonijiet tekniċi li japplikaw għal dawk il-prodotti.”
Minn naħa tagħha, il-Ministru Julia Farrugia Portelli tkellmet dwar kif fl-aħħar snin l-Awtorità ta’ Malta għall-Kompetizzjoni u għall-Affarijiet tal-Konsumatur kompliet bil-proċess li tevolvi ruħha u twessa’ l-iskop tagħha biex tinforma lill-pubbliku.
Hija sostniet l-importanza ta’ dawn l-emendi.
“L-irwol tal-Awtorita Maltija għall-konsumatur ma jserraħx biss fuq prezzijiet imma hemm l-irwol l-ieħor li naraw li l-ġugarelli li jkunu għand it-tfal tagħna mhumiex ġugarelli perikolużi.”
Intqal li llum il-pubbliku għandu l-facilità li jirrapporta każijiet ta’ prodotti mhux sikuri lill-MCCAA, billi jidħol fuq is-sit tal-Awtorità, mccaa.org.mt u jdaħħal id-dettalji fil-“Formola għal nuqqasijiet fis-suq”.
