Iċ-Chairman tal-Kunsill Konsultattiv dwar l-Awtiżmu appella għall-kompassjoni fil-konfront ta’ tfal fuq l-ispettru tal-awtiżmu.
Dan f’eku ta’ storja li qasmet omm ta’ tifel bl-awtiżmu fuq il-midja soċjali, li qalet li kienet ma’ binha f’kafetterija u minħabba l-kundizzjoni tiegħu, kien qed jagħmel l-istorbju.
Raġel li kien bilqiegħda ħdejhom qalilha biex issikket lit-tifel, u meta spjegatlu li binha għandu l-awtiżmu, dan weġibha li ma jinteressahx x’għandu u jinteressah biss li jiskot.
Malli l-omm qasmet din l-istorja, kienu bosta li bdew ixerrduha u jappellaw għall-edukazzjoni.
Fost il-kummenti, spikka dak ta’ wieħed li kiteb li t-tfal bl-awtiżmu huma perikolużi.
Dan il-kumment ġab il-kundanna ta’ bosta, fosthom taċ-Chairman tal-Kunsill Konsultattiv dwar l-Awtiżmu, li stqarr magħna kif dan it-tip ta’ diskors huwa abbużiv.
Alistair De Gaetano spjega kif ċertu ambjent jista’ jwassal għal imġiba differenti mingħand persuni bl-awtiżmu, iżda dan mhux skuża għal diskors ta’ mibegħda.
De Gaetano qal, “Jekk ikun hemm ħafna tgerfix u affarjiet fil-madwar, allura tista’ tiġi għajjien aktar malajr u minħabba f’hekk tesprimi ruħek b’mod differenti. Ħafna drabi naraw eżempju ‘tantrums’ u għal ċertu nies, jgħidu din hija imġiba diffiċli, mentri dik hija persuna li qed tipprova tgħix f’ambjent inaċċessibbli, għalhekk hemm bżonn aktar għarfien u aktar kompassjoni.”
De Gaetano fakkar kif kummenti online, ukoll iġorru magħhom konsegwenzi legali.
Dan wara li s-sena l-oħra ġiet emendata l-liġi marbuta mad-diskors ta’ mibgħeda.
Huqa qal, “Jekk xi ħadd, b’dak li jikteb fuq Facebook jew jinċita l-mibgħeda kontra xi ħadd, jew sempliċiment ikun hemm il-possibilità li jkun hemm mibgħeda kontra grupp, f’dan ir-rigward, persuni bil-faxxa tal-awtiżmu jew il-familjari tagħhom, allura jista’ jkun hemm proċeduri kriminali.”
De Gaetano appella lill-pubbliku biex dejjem iżomm f’moħħu li persuna bl-awtiżmu ma tkunx tista’ tikkontrolla dak li tkun qed tagħmel.
Appella wkoll biex meta wieħed jiltaqa’ m’abbuż, jirrapporta.
Hawn stqarr, “Però jekk taraw ukoll li jkun hemm abbuż, tiddejqux tagħmlu rapport, jew mas-CRPD, jew mal-Pulizija, fl-aħħar mill-aħħar aħna għandna dmir, mhux biss biex nitgħallmu, imma li nipproteġu lil ħaddieħor.”
