Il-qraba ta’ Shannon Mak, it-tfajla ta’ 30 sena li nqatlet brutalment fil-bidu ta’ Awwissu li għadda qed tappella għall-għajnuna biex il-kelba li kienet tant għall-qalbha titwassal l-Olanda.
Shannon Mak inqatlet fit-3 ta’ Awwissu li għadda allegatament mill-eks sieħeb tagħhom Jelle Rijmpa, żagħżugħ Olandiż ta’ 22 sena b’daqqiet ta’ sikkina. It-tfajla nstabet b’rasha mħanxra bejn żewġ karozzi pparkjati fi Triq il-Mastrudaxxi f’Santa Venera.
ONE NEWS jinsab informat li fl-aħħar sigħat, ħbieb tal-qraba ta’ Shannon appellaw biex il-kelba tagħha Saida flimkien mal-affarijiet personali li kellha fl-appartament tagħha fl-Imsida jittieħdu l-Olanda.
“Shannon m’għadhiex magħhna u qed inħossu ħafna n-nuqqas tagħha. Kulħadd kien iħobbha. Nistgħu nagħmlu xi ħaġa għaliha! Il-kelba tagħha Saida li kienet ħafna għall-qalbha qed tħoss ħafna n-nuqqas ta’ Shannon u rridu noħduha l-Olanda, flimkien mal-affarijiet personali tagħha. Biex nagħmlu dan għandna bżonn l-għajnuna tagħkom”, kitbu l-ħbieb ta’ Shannon. Il-qraba ta’ Shannon se jkunu qed jieħdu ħsieb il-kelba Saida.
Il-katavru ta’ Shannon twassal l-Olanda l-ġimgħa li għaddiet biex tkun tista’ tingħata l-aħħar tislima f’art twelidha.
L-għajnuna tista’ tingħata fuq din il-paġna: https://www.doneeractie.nl/shannons-love/-29519
