Il-Gżira tat-Teżor, huwa l-isem ta’ pantomima li qed tittella’ mill-kumpanija tejatrali Bronk Productions.
Crew minn dan l-istazzjon, żar prestazzjoni tal-pantomima, li ttellgħet proprju biex tferraħ grupp ta’ anzjani, minn diversi djar tal-anzjani f’pajjiżna.
Din hija waħda minn numru ta’ inizjattivi organizzati u ffinanzjati mill-Welfare Committee, li l-impenn ewlieni tiegħu huwa li jagħti ħajja ta’ kwalità lill-anzjani.
Qabel ma’ bdiet il-prestazzjoni, ħadna l-kumment ta’ Joseph Borg, magħruf aħjar mas-segwaċi ta’ dan l-istazzjon, bħala Ġorġ.
Huwa fisser xi tfisser għalih il-pantomima, u partikolarment, il-parti tad-dama, li ilu jinterpreta kull sena, għal snin twal.
“It-tmintax-il darba, li qed nagħmel il-parti tad-dama. Biċċa xogħol, biss biss għandna qisu tliet kwarti, siegħa makeup, kostumi, imma parti li nħobbha ħafna għax hemm ħafna ħin mal-udjenza.”
Joseph Borg – id-Dama
Tkellimna wkoll ma’ Angie Casha, li hija l-produttriċi ta’ din il-pantomima, u li spjegatilna l-għan wara din il-prestazzjoni partikolari.
Hija esprimiet is-sodisfazzjon tagħha għat-tbissima li tnisslet fuq fomm l-anzjani, grazzi għal din il-produzzjoni.
“Fil-fatt għadha kemm spiċċat l-ewwel rappreżentazzjoni, li kienet iddedikata lill-anzjani li joqogħdu fil-homes. Il-Gżira tat-Teżor jisimha l-pantomima, li għandna din is-sena, u l-anzjani li ġew illum ġew mill-homes ta’ Malta kollha, grazzi għall-Welfare Committee, li jieħu ħsieb li jagħti sponsor għall-attivitajiet u għall-anzjani.”
Angie Casha – Produttriċi
Tonio Vella, wiċċ sinonimu max-xena tat-teatru f’Malta, iżda li huwa wkoll id-direttur tal-pantomima, tagħna togħma ta’ x’wieħed jista’ jesperjenza waqt ‘Il-Gżira tat-Teżor’.
“Il-pantomima ta’ din is-sena, jisimha ‘il-Gżira tat-Teżor’ u għandha kitba tal-awtur bravu Trevor Zahra, direzzjoni tiegħi, u lirika u arranġament mużikali ta’ Vince Fabri. Hemm ħafna intriċċi u ħafna karattri, karattri allegri li se jkunu qegħdin iżewqu din l-istorja.”
Tonio Vella – Direttur
Din il-pantomima qed tittella’ fit-teatru tal-Junior College, filwaqt li aktar informazzjoni u għall-biljetti wieħed jista’ jżur is-sit, buytickets.com.mt
