Mara anzjana ta’ 72 sena qed issofri minn ġrieħi gravi wara li ntlaqtet minn vettura fl-Imqabba.
L-inċident seħħ dalgħodu, għall-ħabta tat-8:20hrs fi Triq is-Sejba, l-Imqabba.
Il-Pulizija mill-Għassa tal-Żurrieq marru minnufih fuq il-post u mill-ewwel stħarriġ li sar, irriżulta li mara ta’ 72 sena, residenti l-Imqabba, għal xi raġuni sfat milquta minn vettura tat-tip Volkswagen Golf li kienet qiegħda tinstaq minn mara ta’ 25 sena, residenti s-Siggiewi.
Fuq il-post issejħet ambulanza li ħadet lill-mara ta’ 72 sena l-Isptar Mater Dei għall-kura meħtieġa. Iktar tard hija ġiet iċċertifikata li qiegħda ssofri minn ġrieħi ta’ natura gravi.
L-investigazzjonijiet tal-Pulizija dwar dan l-inċident għadhom għaddejjin.
