Mindu twaqqaf it-Tim ta’ Kontra l-Ħasil tal-Flus fi ħdan id-Dipartiment tad-Dwana fl-aħħar kwart tal-2018, instabu aktar minn €1,700,000 flus mhux iddikjarati.
L-aħħar jiem kienu ġranet bieżla għad-Dipartiment tad-Dwana, bl-uffiċjali interċettaw mhux biss flus mhux iddikjarati imma wkoll annimali eżotiċi u marijuana.
Mill-Port u l-Ajruport ġew interċettati aktar minn €85,000 f’seba’ każijiet.
L-Uffiċjali tad-Dwana qabdu wkoll annimali u insetti ħajjin li kienu se jiddaħħlu Malta illegalment f’vettura li kienet ġejja minn Sqallija. Fost dawn kien hemm brimb eżotiċi, żrinġ, u kaxxa b’vażetti mimlija bl-insetti ħajjin. L-annimali ingħataw lill-Awtorità għall-Ambjent għal aktar investigazzjonijiet.
Fl-Ajruport instabu numru ta’ kontenituri mimlija b’marijuana u joints fuq passiġġier li kien għadu kif wasal minn Amsterdam. Dawn ingħataw lill-uffiċjali tal-Pulizija fi ħdan l-Iskwadra ta’ Kontra d-Droga għal aktar investigazzjonijiet.
Sadanittant, għand tal-Posta ġiet interċettata kartolina li kellha fiha sustanza illegali u ingħatat lill-Pulizija.
