L-eks Kunsillier Nazzjonalista u alleat tal-eks Kap Nazzjonalista Adrian Delia, André Grech, saħaq li għad fadal min jitlaq mill-Partit Nazzjonalista.
Huwa qal dan permezz artiklu opinjoni fuq il-ġurnal The Times, fil-ħarġa tat-Tlieta hekk kif irreaġixxa għall-aħħar ġlied fid-Dar Ċentrali bejn il-Kap Bernard Grech u l-eks Viċi Kap Nazzjonalista Robert Arrigo.
André Grech, li rriżenja mill-Partit Nazzjonalista wara li Bernard Grech remih hekk kif segwa l-ordnijiet tal-għaqda Repubblika, tenna kif Arrigo bħal ħafna oħrajn twarrab u ġie trattat b’mod inġust.
Hekk kif spjega li fadal min jagħmel bħal Arrigo u jirriżenja, André Grech saħaq li l-politika tal-esklużjoni ma twassal għal imkien, hekk kif irrimarka wkoll li huwa esperjenza dan mill-qrib ukoll.
Dak li tar-Repubblika qalulu “Għalaq il-bieb warajk u ara tazzarda tiġi lura,” tenna kif din l-imġieba minn dawk li suppost jafu aħjar ma tistax tibqa’ tiġi ttollerata.
Dan b’referenza għat-tmexxija tal-Partit Nazzjonalista u Bernard Grech.
Fil-fatt, hawn André Grech sostna li mkien ma tisma’ b’Viċi Kap Nazzjonalista li ma jitħalliex jitla’ f’Każin Nazzjonalista jew fuq palk f’mass rally waqt kampanja elettorali.
Dan b’referenza għal dak li żvela Robert Arrigo waqt l-aħħar diskors tiegħu bħala Viċi Kap tal-Partit Nazzjonalista fejn qal, “Weġġajt? Iva, għax ma nafx għalfejn wara meeting f’Ħaż-Żabbar, jiena twaqqaft u ma tħallejtx nitla’ fil-first floor tal-każin tal-PN f’Ħaż-Żabbar. Mario Degiorgio waqqafni. Weġġajt? Iva, meta f’Tas-Sliema waqt il-kampanja elettorali iva, kien ġie Emvin Bartolo u jgħili inti isfel mhux fuq il-palk u bqajt bilwieqfa isfel. Affarijiet li qatt m’għandhom qatt isiru. Never again.”
Grech irrimarka kif hija xokkanti li wara dawn iż-żewġ każijiet, ħadd mit-tmexxija tal-Partit Nazzjonalista ma’ apoloġizza ma’ Robert Arrigo.
Fil-fatt, il-Kap Nazzjonalista Bernard Grech mal-mikrofonu ta’ ONE giddeb lil Robert Arrigo.
Dan filwaqt li deputati bħal Ivan Bartolo tas-6pm u Ivan Castillo qalu li fuq Robert Arrigo ma hemmx kwistjoni.
F’dikjarazzjoni ċara lejn it-tmexxija tal-Partit Nazzjonalista u Bernard Grech, André Grech saħaq li l-arroganza tagħhom u l-mibegħda lejn kull min jindenja ruħu jopponihom, qed tkisser lill-Partit.
Temm jgħid li l-Partit Nazzjonalista mess il-qiegħ u mingħajr bidliet radikali, l-affarijiet se jibqgħu sejrin għall-agħar.
