Uffiċjal fl-Amministrazzjoni ta’ Trump li xtaq jibqa anonimu, qal li l-kumpanija Amazon tefgħat offerta sabiex tixtri TikTok bħala attentat fl-aħħar ħinijiet hekk kif minn nhar is-Sibt din il-pjattaforma soċjali ferm popolari mhux se tkun tista’ tiġi aċċessata aktar fl-Istati Uniti.
Jidher li din l-offerta waslet f’ittra indirizzata lill-Viċi President JD Vance u lis-Segretarju tal-Kummerċ Howard Lutnick.
Skont il-liġi Amerikana, il-kumpanija Ċiniża ByteDance li tmexxi l-kumpanija TikTok, trid tbigħ il-pjattaforma lil xerrej approvat jew inkella ma tibqax topera fl-Istati Uniti. Fil-jum tal-inawgurazzjoni tiegħu Donald Trump kien waqqaf l-implimentazzjoni ta’ din il-liġi, li kienet unanimament approvata mill-Qorti Suprema, billi estenda ż-żmien ta’ skadenza għal nhar is-Sibt.
Trump kien indika li jista’ jerġa jestendi d-data iżda qal ukoll li kien qed jistenna li jintlaħaq ftehim matul din il-ġimgħa.
S’issa għadu ma kien hemm l-ebda kumment minn naħa ta’ Amazon jew TikTok.
