L-Alliance Française Malte-Méditerranée inawgurat binja ġdida tagħha fil-Kulleġġ San Ġorġ Preca fil-Ħamrun, pass ieħor importanti fil-promozzjoni tal-lingwa u l-kultura Franċiża f’Malta.
Preżenti għall-inawgurazzjoni kien hemm il-Ministru għall-Wirt Nazzjonali, l-Arti, u l-Gvern Lokali Owen Bonnici, kif ukoll l-E.T. Sandrine Lelong-Motta, l-Ambaxxatriċi Franċiża għal Malta. Attendew ukoll membri mill-amministrazzjoni u l-istaff tal-Kulleġġ San Ġorġ Preca, kif ukoll uffiċjali mill-Ministeru tal-Edukazzjoni.
Fil-kummenti tiegħu waqt l-okkażjoni, il-Ministru Owen Bonnici qal, “L-Alliance Française de Malte-Méditerranée mhix biss ċentru lingwistiku, iżda ċentru ta’ eċċellenza. Imwaqqfa qabel Malta kisbet l-indipendenza u saret repubblika, il-preżenza tagħha għal aktar minn 60 sena turi l-konsistenza u l-valur li toffri lill-pubbliku Malti.”
“Il-fatt li aktar minn 400 student jattendu kull sena huma prova tar-reputazzjoni eċċellenti tagħha,” qal il-Ministru Bonnici.
“Dan il-kapitlu ġdid fil-vjaġġ tal-Alliance Française jafferma mill-ġdid id-dedikazzjoni tagħha biex tkompli ttejjeb ir-rabtiet kulturali bejn Malta u Franza, filwaqt li tipprovdi opportunitajiet edukattivi siewja u tarrikkixxi x-xena kulturali lokali,” temm jgħid il-Ministru Bonnici.
Matul iċ-ċerimonja, l-Alliance Française żvelat l-ispazju interattiv tal-mużew diġitali ‘Micro-Folie’ fil-librerija tal-iskola sekondarja. Din l-installazzjoni moderna tinkludi aktar minn 4,000 xogħol tal-arti minn mużewijiet Franċiżi ewlenin u toffri esperjenzi ta’ realtà virtwali, tipprovdi vjaġġ kulturali immersiv għall-istudenti u l-pubbliku ġenerali.
Iċ-ċerimonja tal-inawgurazzjoni kienet tinkludi wkoll wirjiet minn studenti ta’ l-istess Kulleġġ.
Għal aktar informazzjoni żur il-website, https://alliancefrmalta.com/
