Il-Pulizija arrestat tliet Taljani wara sejba kbira ta’ droga, allegatament raża tal-kannabis li kienet qed tinżamm moħbija fuq pallet f’garaxx f’Tas-Sliema.
Dawn il-persuni, li l-età tagħhom tvarja bejn it-33 u 57 sena u residenti f’Birkirkara, kienu arrestati wara li nstabu fil-pussess ta’ iktar minn 25 kilo tal-pjanta tal-kannabis moħbija f’kaxex li kien fihom paketti tat-tissues.
Din il-qabda ta’ droga saret waqt rejd mill-Pulizija tal-Iskwadra ta’ kontra d-droga u tar-Rapid Intervention Unit fi Triq Matthew Pulis.
Xhieda fuq il-post fejn seħħ ir-rejd qalu ma’ ONE News li l-Pulizija dehru deħlin fil-garaxx ta’ blokka li qiegħda tinbena b’ħeffa liema bħalha.
Fi ftit ħin, inqalgħet it-triq u nħolqot kommossjoni sħiħa meta l-pulizija dehru joħorġu għadd ta’ persuni mmannetjati. Tnejn minnhom ittieħdu direttament id-Depot tal-Pulizija l-Floriana filwaqt li raġel ieħor baqa’ jinżamm fuq il-post sakemm inħarġet is-sustanza kollha tad-droga.Viżibilment emozzjonat u aġitat, ir-raġel li allegatament huwa Taljan deher jgħatti wiċċu mill-cameras b’maktur tal-karti filwaqt li beda jpejjep sigarett fuq għatba ta’ binja faċċata fejn saret is-sejba.
Il-Pulizija baqgħu fuq il-post sakemm l-esperti tal-forsensika iddokumentaw ix-xena kollha tar-reat li fil-mument kienet qed tintuża bħala maħżen għall-ħaddiema li kienu qed jagħmlu xogħlijiet fil-blokka tal-appartamenti.
Ftit qabel it-tlieta ta’ waranofsinhar il-Pulizija dehru jgħabbu numru ta’ kaxxi mimlijin bis-sustanza illegali fil-vann u minn hemm ittieħdu d-depot tal-Pulizija taħt sigurtà stretta bi skorta armata mill-Pulizija tar-Rapid Intervention Unit.
Nifhmu li dwar dan il-każ infteħet inkjesta Maġisterjali bil-Pulizija mistennija tressaq lit-tliet persuni l-Qorti fil-jiem li ġejjin. Huma mistennija jitressqu taħt għadd ta’ akkużi fosthom pussess u traffikar tad-droga.
Din kienet it-tieni qabda kbira ta’ droga fi żmien ħmistax wara d-Dwana flimkien mal-Pulizija sabet tunellati ta’ droga moħbjija f’għadd ta’ containers fil-freeport.
