Il-kap tad-delezzjoni Laburista fil-Parlament Ewropew u Viċi President tal-Grupp tas-Soċjalisti u d-Demokratiċi, Alex Agius Saliba, irreaġixxa għall-aħbar ta’ Politico fejn tenna li, f’waħda mill-ogħla pożizzjonijiet influwenti fl-istituzzjonijiet Ewropej, Roberta Metsola qatt ma ddikjarat il-konflitt ta’ interess li għandha dwar ir-raġel tagħha fejn jidħlu r-regoli tal-Parlament Ewropew, li tmexxi, dwar il-lobbyists.
Waqt li qal li qajjem il-każ fil-Grupp tas-Soċjalisti u d-Demokratiċi biex tittieħed azzjoni, Agius Saliba fakkar ukoll li dan kollu qed iseħħ ġimgħa biss wara li l-istess Metsola ħolqot każ ta’ nepotiżmu meta ħatret lir-raġel t’oħtha bħala Kap tal-Kabinett tagħha.
Insista li minn persuna, li temmen li hi denja li tkun mexxej, wieħed jistenna tmexxija li tkun ta’ eżempju, iżda, kif jgħid il-Malti, mill-kliem għall-fatti hemm baħar jikkumbatti fil-każ ta’ Metsola.
“Min verament jemmen fit-trasparenza jinsisti mhux biss li jkun hemm il-protokolli meħtieġa, iżda wkoll ikun jidher li l-protokolli qed jitwettqu b’mod ugwali u mingħajr eċċezzjonijiet,” qal Agius Saliba, iżda kompla li mhux hekk taħsibha Metsola, li għalkemm konxja mir-rwol delikat tar-raġel tagħha, għażlet li tappoġġja pjan li jeskludi lilha biss minn kwalunkwe forma ta’ skrutinju.
Hu semma li ftit persuni fil-Parlament Ewropew kienu konxji mir-rwol prominenti tar-raġel ta’ Metsola fis-settur tal-cruiseliners, waqt li hi ma ddejqet xejn titkellem diversi drabi fuq is-settur inkluż fil-Malta Maritime Forum u f’laqgħat maċ-Chamber of SMEs.
Hu qal li, naturalment, wieħed jistaqsi x’kien il-ħsieb ta’ Metsola li teżonera lilha nnifisha minn dan l-iskrutinju.
“Kif din Roberta Metsola tippretendi li kulħadd għandu jkun trasparenti u, imbagħad, hi ma tkun trasparenti f’xejn, kif fl-aħħar mill-aħħar tmexxi l-affarijiet u l-obbligi tagħha hawnhekk fuq livell Ewropew”.
Alex Agius Saliba
Il-Viċi President tal-S&D tenna li din lanqas hi l-ewwel darba li Metsola naqset milli tosserva l-protokolli tat-trasparenza u s-sena l-oħra pprovat targumenta li għandha tiġi eżentata mill-obbligu li tiddikjara r-rigali li tirċievi., wara li wkoll naqset li tiddikjara 125 rigal fiż-żmien stipulat.
“Immaġinaw kieku jien jew xi wieħed mill-kollegi tiegħi ma niddikjarawx l-interessi tagħna fil-proċessi li nkunu għaddejin hawnhekk fil-Parlament Ewropew minħabba rwoli li jkollna aħna jew membri viċini tal-familja tagħna. Immaġinaw kemm protesti, kemm talbiet tar-riżenji, imma qisha Roberta Metsola qiegħda ’l fuq minn kollox, tista’ tikkritika lil kulħadd, tista’ tipprova tagħti eżempju u tmexxi ’l quddiem politika ta’ trasparenza, imma, fl-aħħar mill-aħħar, din l-istess politika li timbotta ’l quddiem, hi ma tapplikahiex u tippretendi li ma tapplika għaliha qatt.”
Alex Agius Saliba
Fuq il-midja soċjali, Agius Saliba wkoll tenna li issa joħorġu l-apoloġisti ta’ Madame President, b’referenza għall-Partit Nazzjonalista u dawk li jappoġġjawh, biex jgħidulna li tal-Politico qed jgħiru għal Metsola.
AQRA AKTAR:
