F’artiklu fuq il-ġurnal Illum, Albert Buttigieg għażel li jigdeb dwar diversi suġġetti fejn ippreżenta anke numri u fatti ħżiena. Dan biex ikompli bl-attakki tiegħu u tal-Partit Nazzjonalista fuq il-Gvern u l-Ministeru tal-Intern.
Li spikka hu kif għal darb’oħra attakka l-politika tal-gvern fuq l-immigrazzjoni fejn minflok ħa l-pożizzjoni ta’ Malta ħa dik ta’ entitajiet internazzjonali, u tal-estremisti fil-Partit Nazzjonalista li hu parti mill-klikka tagħhom. Fil-fatt tul is-snin li għaddew din il-klikka ppruvat titfa’ s-suldati l-ħabs u fetħu kawżi lill-Prim Ministru u lill-Ministru għall-Intern fost oħrajn.
Fil-fatt, dak li kiteb fil-gazzetta Illum Buttigieg jinżel għasel għal dawk li jagħmlu pressjoni biex f’Malta jiddaħħlu aktar immigranti irregolari. Din hi strateġija li l-Gvern Malti fl-aħħar snin iġġildilha kemm felaħ, fl-istess ħin li s-suldati Maltin baqgħu isalvaw il-ħajjiet fuq il-baħar fejn kien l-obbligu ta’ Malta li tagħmel hekk.
Iżda, il-kitba ta’ Buttigieg tgħamilha ċara li jekk il-PN jingħata fiduċja jew Buttigieg isir ministru, se jħaddem mudell differenti minn dak tal-gvern preżenti, li jinżel għasel mat-traffikanti tal-bnedmin. Lit-traffikanti tal-bnedmin li l-Gvern iġġilidilom b’politika ta’ prevenzjoni u ritorn, li waslet għal tnaqqis ta’ 93% fil-wasliet f’ħames snin.
Fl-artiklu tiegħu Buttigieg mhux biss attakka l-politika tal-gvern fuq l-immigrazzjoni irregolari iżda irrepeta wkoll il-gidba li fl-aħħar ħames snin kien hemm -14 il- suwiċidju fil-ħabs. Buttigieg jagħmel dan is- suġġett ballun politiku, meta f’oqsma sensittivi bħal dawn anke każ wieħed trid isir ħidma biex ikun evitat.
Il-fatti però huma differenti minn kif preżentahom Buttigieg. Fl-aħħar ħames snin kien hemm ħames suwiċidji fil-ħabs, filwaqt li jekk Buttigieg irid iqabbel, fis-sentejn bejn l-2010-2011 kien hemm erba’ suwiċidji f’ħabs b’ħafna inqas popolazzjoni. Jidher li għal snin oħra ta’ żmien gvernijiet nazzjonalisti l-informazzjoni inħbiet.
Fil-ħabs ukoll saru riformi kbar biex is-sitwazzjoni titranġa minn kif tħalliet fi żmien amministrazzjonijiet nazzjonalisti.
