Qed titfisser bħala qabda kbira ta’ droga kannabis oħra li daħlet fil-Freeport.
ONE NEWS jinsab informat li matul il-jum, l-uffiċjali tad-Dwana għamlu qabda ta’ bejn erba’ u ħames tunnellati ta’ droga kannabis.
Għalkemm għadha ma ġietx ikkonfermata mill-Pulizija u mill-uffiċjali tad-Dwana, is-sorsi qalu li l-qabda qed tiġi investigata kemm mill-uffiċjali tad-Dwana u anke mill-Iskwadra ta’ Kontra d-Drogi.
Is-sorsi qalu li d-droga nstabet qalb oġġetti li kienu qed jinġarru f’kontejner li wasal u tniżżel f’Malta fl-aħħar jiem.
Din il-qabda ssegwi qabda kbira oħra ta’ droga li saret fil-Port Ħieles fil-ġimgħat li għaddew.
