Aktar sħab soċjali f’pajjiżna komplew jesprimu s-sodisfazzjon tagħhom għar-rapport li ħarġet ftit tal-jiem ilu l-Kummissjoni Ewropea.
F’dan ir-rapport, il-Kummissjoni Ewropea sostniet li t-tkabbir ekonomiku f’pajjiżna għal din is-sena se jkun akbar minn dak previst. Dan minkejja l-impatt tas-sitwazzjoni internazzjonali li qed jiddominaw l-aħbarijiet ta’ kuljum.
ONE News tkellem mal-Kap Eżekuttiv tal-Kamra għan-Negozji Żgħar u Medji, Abigail Mamo, li nnutat b’mod pożittiv dak li ħareġ minn dan ir-rapport, speċjalment f’sitwazzjoni fejn Malta, bħala gżira, hija dipendenti fuq ħafna swieq barranin.
Qalet, “Wieħed irid iżomm f’moħħu li Malta hija ekonomija żgħira u aħna dipendenti ħafna fuq il-markets ta’ madwarna, jiġifieri fl-inċertezza kollha li hemm tajjeb li fil-konfront ta’ Malta hemm tbassir pożittiv. imma rridu nżommu għajnejna miftuħin u naraw x’inhu jiġri madwarna.”
Filwaqt li faħħret anke s-sostenn tal-Gvern quddiem iż-żieda fil-prezzijiet tal-gass u taż-żejt, li wasslet għal inflazzjoni kbira fis-settur, hija spjegat kif kollox jiddipendi fuq kemm se ttul il-gwerra bejn ir-Russja u l-Ukrajna.
Qalet, “Jidher li l-mekkaniżmu li Malta ħadmet fuqu min naħa tal-Gvern, relatat ma’ li nżommu l-inflazzjoni under control permezz tal-capping fuq il-prezz tal-enerġija u s-sussidji li hemm f’dan ir-rigward, ħadem għax Malta għandha l-inqas rata ta’ inflazzjoni. Ovvjament, jiddependi ħafna kemm se ddum il-kriżi relatata mal-gwerra bejn ir-Russju u l-Ukrajna, għaliex hemm limitu ta’ kemm wieħed jista’ jagħti dan is-sapport.”
Intant ONE News tkellem ukoll ma’ Andrew Agius Muscat, li huwa l-Kap Eżekuttiv tal-Assoċjazzjoni Maltija tal-Lukandiera u s-Sidien tar-Ristoranti.
Huwa faħħar il-fatt li l-Kummissjoni Ewropea għażlet li tirrevedi t-tbassir għal Malta, filwaqt li elenka elementi importanti li pajjiżna għandu jibqa’ jaħdem fuqhom sabiex jiġbed aktar turisti lejn pajjiżna.
Qal, “Il-konnettività hija importanti. Aħna gżira u, jekk ma jkunx hemm ajruplani ġejjin ġo pajjiżna, ovvjament dik hija problema. Qed isir ħafna xogħol, hemm bżonn li nħaddmu iżjed rasna, anke minħabba li qed isiru tibdiliet fil-liġi internazzjonAli dwar, pereżempju, restrictions dwar emissjonijiet ta’ ajruplani.”
Huwa saħaq ukoll fuq l-importanza li l-prodott Malti jibqa’ jingħata prijorità assoluta.
Qal, “Inħarsu lejn il-prodott. Il-prodott tagħna huwa dejjem importanti. Kien u jibqa’ importanti. Il-prodott li bih kemm jista’ jkun ngħollu l-kwalità tal-esperjenza tat-turist għal pajjiżna għaliex, ovvjament, iktar ma se jgħaddi żmien iktar jidher ċar li hemm bżonn nattiraw dak it-tip ta’ klijent li jfittex il-kwalità.”
