Malta ingħaqdet fi sforz dinji biex tiżdied is-sigurtà fit-toroq li ta’ kull sena jaħsdu l-ħajja ta’ madwar 1.25 miljun persuna.
Fl-Ewropa, ta’ kull sena qed tmut persuna kull sitt minuti, jiġiferi medja ta’ 230 persuna kuljum.
F’Malta, 19-il persuna tilfu ħajjithom f’inċidenti tat-traffiku matul is-sena li għaddiet, waqt li fl-ewwel disa’ xhur tas-sena, it-toroq Maltin raw 16-il fatalità oħra.
Iċ-ċifri juru wkoll li nofs il-vittmi kienu nies mexjin fit-triq, ċiklisiti u sewwieqa ta’ muturi.
F’konferenza mtella’ mill-Ministeru għas-Saħħa u l-Għaqda Dinjija tas-Saħħa dwar is-sigurtà fit-toroq, il-Mibgħut Speċjali tas-Segretarju Ġenerali tan-Nazzjonijiet Magħquda u l-eks Kap Eżekuttiv tal-Ferrari Jean Todt, faħħar l-isforzi tal-gvern sabiex f’pajjizna jonqsu l-inċidenti tat-traffku. Saħaq li Malta qed tingħaqad fi sforz globali biex titqajjem iktar kuxjenza dwar is-sigurtà fit-toroq maltin.
L-eks Kap Eżekuttiv tal-Ferrari Jean Todt appella lis-sewwieqa sabiex ma jsuqux b’veloċità, ma juzawx appart teknoloġiku waqt is-sewqan, jintlibes iċ-ċintorin tas-sigurtà u l-elmu. Appella wkoll lis-sewwieqa biex ma jsuqux taħt l-effett tal-alkaħol, li huwa fost l-aktar fatturi li jwasslu għal inċidenti fatali tat-traffiku.
Is-Sur Todt żied li b’iktar inizjattivi, iridu nilħqu l-mira Ewropea li l-imwiet u l-persuni midruba f’inċidenti tat-traffiku jonqsu bin-nofs sal-2020.
Id-Deputat Prim Ministru u Ministru għas-Saħħa Chris Fearne qal li l-gvern huwa impenjat li jieħu miżuri biex jonqsu l-inċidenti fit-toroq Maltin.
Huwa żied jgħid li issa huwa ż-żmien opportun biex niddiskutu l-użu tal-intelliġenza artifiċjali fit-toroq tagħna.
