Il-Malta Enterprise ħabbret li fl-aħħar tnax-il xahar approvat mija u tliet proġetti ta’ investiment dirett barrani u lokali li se jkun qegħdin jissarfu f’aktar minn elf karriera ta’ kwalità matul it-tliet snin li ġejjin.
Fil-fatt, il-Malta Enterprise approvat ‘l fuq minn ħamsa u sebgħin miljun ewro ta’ investment minkejja l-isfidi internazzjonali.
Dan tħabbar f’konferenza tal-aħbarijiet bit-tema, Inwettqu Flimkien fejn fost oħrajn, il-Kap Eżekuttiv tal-Malta Enterprise, Kurt Farrugia stqarr kif minn studji li qed tagħmel il-Malta Enterprise stess, il-maġġornaza tal-impjiegi l-ġodda, qed imtlew minn gradwati Maltin.
“Fil-fatt dak li ħabbarna llum b’investiment ta’ madwar ħamsa u sebgħin miljun fi tnax-il xahar li għaddew u li ħa joħolqu madwar elf impjieg illi fil-maġġoranza tagħhom, anki minn studji li għamilna, qegħdin imorru għand Maltin studenti tagħna u nies li jaħdmu f’diversi oqsma li jagħmlu ‘upskilling’ u jimxu lejn oqsma oħra. Allura qed nara li Malta hija destinazzjoni tajba ħafna biex nattiraw investiment ġdid u naraw li l-investimnet li hawn ġo Malta jkompli jikber.”
Fis-sit ta’ kostruzzjoni fejn sal-aħħar tas-sena se tkun qed topera faċilità tal-ogħla livell ta’ Torrent Pharma li se tkun qed tiċċertifika u tesporta l-mediċini tagħha lejn diversi swieq internazzjonali, il-Viċi President ta’ Torrent Pharmaceuticals, Amul Agrawal, innota kif fis-settur tal-farmaċewtika l-loġistika se tkun fattur importanti ħafna.
B’hekk pajjiżna se jkun kruċjali biex iqarreb l-operat tal-kumpanija lejn l-Ewropa.
“Logistic is going to become the key stakeholder in the pharma industry where you fight for every cent. So, we realised that this is a good opportunity for us to start. We were quite thankful of the entire Ministry, and Malta Enterprise doing all the support in pulling everything.”
Il-kumpanija Torrent Pharma Malta qed tinvesti mat-tnejn u għoxrin miljun ewro sabiex tisabilixxi l-operat tagħha f’pajjiżna biex ikollha aċċess u awtorizzazzjoni għas-suq Ewropew. B’hekk f’din il-faċilità se jkunu qegħdin jinħolqu madwar mija u għoxrin karriera ġdida.
Madwar sena ilu beda l-proġett fejn illum madwar tletin fil-mija tal-faċilità fiż-Żona Insudtrijali ta’ Ħal Far diġà tlestiet u se tkun finalizzata sal-aħħar ta’ din is-sena.
Din il-faċilità nbniet flok fabbrika li temmet l-operat tagħha fuq tliet elef metru kwadru ta’ art. Il-binja se tkun qed tiffoka fuq is-sostenibbiltà u l-użu effiċjenti tal-enerġija u l-ilma. Dan filwaqt li se tkun għolja tmintax-il metru b’hekk ikollha l-ispazju meħtieġ mingħajr ma tieħu aktar art.
Il-Ministru għall-Ambjent, l-Enerġija u l-Intrapriża, Miriam Dalli nnutat kif dan l-investiment qiegħed isir fl-isfond ta’ sfidi internazzjonali kbar.
Hija żiedet tgħid kif dan l-investiment ikompli juri l-fiduċja li n-negozju għandu f’pajjiżna bħala ġuriżdizzjoni serja u effiċjenti li tiffaċilità l-investiment.
Il-Ministru Dalli innotat wkoll kif pajjiżna qiegħed jattira investiment li fl-ekonomija l-blu u f’setturi li jipprovdu valur miżjud anki permezz ta’ start-ups li jibdew l-operat tagħhom f’pajjiżna.
