Fl-2016 kien hemm madwar 84% tal-vittmi ta’ vjolenza domestika li kienu nisa’; fejn kważi 80% minnhom esperjenzaw għall-ewwel darba din il-pjaga tas-soċjeta. Dan joħroġ mir-Rapport Annwali tal-2017 mħejji mill-Kummissjoni għall-Vjolenza Domestika.
Fl-istess rapport jirriżulta, li fl-istess sena, kien hemm aktar minn 1,400 mara li sfat vittma ta’ vjolenza domestika mentri n-numru ta’ rġiel laħaq aktar minn mitejn.
Ir-rapport juri wkoll li l-aktar każijiet irrapportati lill-pulizija kienu minn nisa li għandhom bejn l-40 u d-49 sena.
Tlieta u għoxrin fil-mija tan-nisa li għandhom bejn il-35 u d-39 sena kienu fost l-aktar li rrapportaw il-każijiet tagħhom lill-għaqda mhux governattiva Victim Support Malta.
Sabiex tiġi indirizzata din ir-realtà, il-Gvern approva emendi fil-liġi dwar il-vjolenza domestika li ġie konformi mal-Konvenzjoni ta’ Istanbul.
Il-Ministru għall-Ugwaljanza Helena Dalli qalet li l-Kunsill Ewropew tawh l-ogħla standard f’dak li għandu x’jaqsam ma’ vjolenza:
Għandna liġi b’saħħitha ħafna u li hija waħda li l-KE iqisuha bħala gold standard fejn tidħol vjolenza…hija liġi li magħha ħriġna wkoll strateġija ta’ kif ser nimxu bħala qasam
Ironikament, l-istess liġi li qed tissalvagwardja l-aħjar interessi tal-vittmi vvotaw kontriha uħud mill-membri tal-oppożizzjoni fosthom il-Kap Nazzjonalista Adrian Delia fejn dan tal-aħħar kien iddikjara li jekk jingħata l-mandat elettorali ser ikun qed jirrevoka din il-liġi fl-ewwel mitt jum ta’ Gvern Nazzjonalista.
Ma’ One News, Joe Gerada bħala l-Kummissarju tal-Kummissjoni Nazzjonali għall-Vjolenza Domestika spjega kif dawn l-emendi ser jgħinu lill-Malta sabiex tkompli ssaħħaħ il-mekkaniżmi sabiex in-numru ta’ persuni li jisfaw vittmi ta’ vjolenza domestika jonqos:
Il-konvenzjoni ta’ Istanbul huwa dokument li jelenka kif għandhom jiġu organizzati s servizzi u kif għandhom jaħdmu flimkien dan hu l isfida li nkabbru nsaħħu l-liġijiet, il-provedimenti li hemm, ir-riżorsi umani, l-istutizzjonijiet il-mod kif jorganizzaw- L-aktar importanti huwa l awareness pubblika biex tkun il-komunità nfisha li timpenja ruħha kontra ħaġa bħal din.
