Il-Prim Ministru Robert Abela ħabbar li fil-jiem li ġejjin se jittieħdu deċiżjonijiet strateġiċi mill-Gvern, immexxi minnu, biex ikompli jagħti aktar stabilità lin-nies fl-isfida tal-għoli tal-ħajja.
Dan intqal minnu waqt intervista t-Tnejn filgħaxija waqt il-programm XTRA, fejn sostna li din l-inizjattiva marbuta ma’ prodotti essenzjali turi li l-Gven għandu jħoss il-polz tal-poplu.
“Kellek din ir-realtà fejn in-nies qed jgħidulek li qed imorru fis-supermarkets u l-oġġetti tal-aktar prodotti essenzjali jitilgħu minn ġimgħa għal oħra, minn ġimagħtejn għal ġimagħtejn, u dik xi ħaġa li bdejna narawha. Issa legalment ma stajna nagħmlu xejn. Kull espert li tkellimna miegħu qalilna suq liberu u jiddetta s-suq. Kif qaltilna l-Oppożizzjoni fis-suq tal-enerġija, inċidentalment. Dik ma kinitx risposta aċċettabbli għalija. Rajt x’għamlu pajjiżi oħrajn jew x’naqsu milli jagħmlu, studjajna, poġġejna bilqegħda, poġġejna mal-importaturi, poġġejna mas-sidien tas-supermarkets u nemmen li fil-jiem li ġejjin nistgħu nħabbru inizjattiva li fuq kollox se tkun qed turi fejn tħabbat il-qalb.”
Hu sostna li din l-inizjattiva se tidħol fis-seħħ wara diskussjonijiet mal-partijiet konċernati.
“Li l-għaqal kien li poġġejna madwar il-mejda, iddjalogajna, ma mponejniex, imma spjegajna x’inhuma r-realtajiet, spjegajna wkoll kif dan il-Gvern kien hemm għal dawn l-istess persuni li jimportaw u jbiegħu fl-aktar mumenti sensittivi tal-pandemija u żammhom għaddejjin u r-raġunament kien: issa hu l-mument li anke b’element ta’ corporate social responsability, ejja ħalli tagħtu xi ħaġa lura lill-poplu tagħna.”
Dr Abela spjega kif bħala Gvern qed jaħdem b’żewġ prinċipji, li jitfa’ iżjed flus fil-bwiet tan-nies u li b’miżuri oħrajn, dawk il-flus li jkun ta lill-poplu ma jittiħdux.
F’din l-intervista, il-Prim Ministru Robert Abela semma ħemel ta’ miżuri soċjali bla preċedent.
“Kif xħetna aktar flus fil-but tan-nies? Żieda bla preċedent fil-pensjonijiet, żieda bla preċedent fiċ-Children’s Allowance, it-tisħiħ tas-sussidju tal-kera, il-mekkaniżmu addizzjonali għall-għoli tal-ħajja, l-ikbar żieda li qatt ingħatat fil-Paga Minima Nazzjonali u mhux se tkun ta’ darba, imma se tibqa’ għaddejja sal-aħħar ta’ din il-leġiżlatura.”
Il-Prim Ministru sostna li l-amministrazzjoni tiegħu tħaddan il-prinċipju tal-interess nazzjonali, hekk kif waqt sfidi internazzjonali bla preċedent għamlet l-għażla strateġika favur il-politika ta’ stabilità fil-prezzijiet tal-enerġija u l-fuels, li tipproteġi lill-familji u n-negozji minn din iż-żieda fil-prezzijiet.
Meta mistoqsi dwar l-elezzjonijiet, li se jsiru fit-8 ta’ Ġunju li ġej, Dr Abela sostna li l-poplu għandu għażla ċara quddiemu.
“Nemmen li jkollna Ewroparlamentari li huma b’saħħithom biex jiddefendu l-interessi ta’ pajjiżna. Rajna xi strateġija kellna f’dawn l-aħħar xhur, b’saħħitha ta’ attakki kontra pajjiżna minn ġewwa l-Parlament Ewropew. Kienet kritika mill-aktar inġusta. Għalxiex kienet inġusta? Bdejt biha u ħa nagħlaq biha, kellek sitwazzjonijiet fejn l-interess nazzjonali kien hemm min ittradih, fost l-Ewroparlamentari li ġejjin mill-Grupp Parlamentari Nazzjonalista. Kien hemm dawk li, għall-interessi partiġġjani tal-familja politika, li jagħmel parti minnha l-Partit Nazzjonalista, l-EPP, f’ċirkostanzi analogi għal dawk ta’ pajjiżna, lil pajjiżna kisru u farrku biex jgħatti dak li bdew jagħmlu pajjiżi oħrajn.”
Meta mistoqsi dwar il-Membru Parlamentari Ewropew Nazzjonalista Roberta Metsola, il-Prim Ministru wieġeb hekk.
“Kif inħares lejn Roberta Metsola? Tidħaqx bija u l-verità li ħa ngħidlek. Meta nħares lejha nara lil Simon Busuttil.”
Fi tmien din l-intervista fuq kollox ħarġet l-enerġija lejn aktar ħidma favur iċ-ċittadini Maltin u Għawdxin.
“Ħa nagħti ruħi u saħħti biex niżġura li ħadd u ħadd ma jweġġa’ lill-poplu, partikolarment lil poplu żgħir u batut.”
Ara l-intervista hawnhekk:
