“Din il-ġimgħa bgħatna messaġġ b’saħħtu li persuni b’diżabilità se jkunu qed imexxu lil pajjiżna.”
Qal dan il-Prim Ministru u Mexxej Laburista Robert Abela waqt attività politika fiċ-Ċentru Nazzjonali Laburista, fil-Ħamrun u li kienet konformi mal-miżuri kollha tal-Awtoritajiet tas-Saħħa.
Dwar l-approvazzjoni unanima fil-Grupp Parlamentari u l-Eżekuttiv biex Oliver Scicluna jiġi co-opted fil-Parlament, u kif żvolġew l-affarijiet fl-aħħar ġimgħa, Dr Abela fakkar fl-istedina tal-Kap tal-Oppożizzjoni Bernard Grech biex deputat prospettiv jaqsam il-kamra u b’hekk jirbaħ siġġu jekk l-istess deputat jirbaħ l-elezzjoni każwali.
Hawnekk il-Prim Ministru Abela rrimarka kif b’din il-mossa anti-demokratika, l-istess Oppożizzjoni pruvat tisfumaha wara li d-deputat li stiednet magħha ma ġiex elett u skatta proċess approvazzjoni biex jiġi co-opted Oliver Scicluna.
Dan minkejja wkoll li l-istess mossa intużat biex ġew eletti l-aħħar żewġ kapijiet tal-Oppożizzjoni.
Dr Abela stqarr: “Jien dejjem ħarist lejn persuni li għandhom diżabilità li jridu jkunu mexxejja ta’ dan il-pajjiż. Mexxejja u mhux nitkellmu f’termini ta’ diżabilità imma f’termini ta’ abilità u l-messaġġ li bgħatna din il-ġimgħa nemmen li kien wieħed b’saħħtu ħafna.”
Il-Prim Ministru Abela qal li l-co-option ta’ Oliver Scicluna bħala Deputat Laburista għandha tkun opportunità ta’ għaqda nazzjonali, imma minkejja dan l-Oppożizzjoni għadha sa issa ma ferħitlux.
Dwar il-mekkaniżmu li sew jassal għal rappreżentanza aktar ugwali fil-Parlament mill-elezzjoni ġenerali li jmiss, il-Prim Ministru qal li dan se jwassal għal politika aktar rappreżentattiva, u jittama li jintlaħqu l-kwoti qabel iż-żmien stipulat għal dan il-mekkaniżmu.
Il-Prim Ministru saħaq ukoll fuq il-parteċipazzjoni ta’ aktar żgħażagħ fil-politika tal-pajjiż: “Nemmen li l-pajjiż għandu bżonnkom fit-tmexxija tieħu u se nibqa’ nisħaq dwar l-importanza ta’ aktar żgħażagħ fit-tmexxija tal-pajjiż, aktar nisa fit-tmexxija tal-pajjiż u b’hekk li jkollna Gvern li jkun aktar rappreżentattiv tad-diversi setturi tas-soċjetà u jista’ joffri riżultati aħjar.”
Dwar il-kwistjoni li tqajjmet fuq l-istazzjonijiet politiċi f’pajjiżna, il-Prim Ministru Abela qali li se jkun qed jiddefendi bis-saħħa d-dritt li partit politiku jkollu l-mezzi tax-xandir tiegħu. Madankollu rrimarka kif din il-kwistjoni jidher li se tkun sors ieħor ta’ inkwiet għall-Partit Nazzjonalista hekk kif ma hemmx qbil dwarha.
Dr Abela tkellem ukoll dwar suġġetti bħall-Ewtanasja hekk kif sostna li minkejja li għadu ma ffurmax opinjoni dwar dan is-suġġett, qal li d-diskussjoni dwar dawn it-tip ta’ suġġetti f’pajjiż demokratiku bħal Malta, għandha ssir.
Dr Abela temm jgħid li mal-Partit Laburista, il-poplu jaf fejn qiegħed, u dan l-element ta’ serjetà ser jibqa’ jikkarratterizza l-politika ta’ għada għal dan il-pajjiż.
Il-Prim Ministru Robert Abela sostna: “Nibqgħu mexjin b’sena ta’ ottimżu, b’sens ta’ pożittività, ejja ħa nagħtu t-tama, il-kuraġġ lin-nies. Jien nemmen li għada se jkun aħjar mil-lum, pitgħada se jkun aħjar minn għada, ejja ħa nibqgħu mexjin flimkien ‘il quddiem sabiex nuru li aħna verament il-Gvern tal-Għawdxin u l-Maltin kollha.”
