“M’aħniex perfetti, u għamilna żbalji, u minn dawn l-iżbalji nitgħallmu, iżda difett li żgur m’ għandniex huwa li nigdbu. Aħna kelma waħda għandna, u din il-kellma hi tal-azzar u nzommuha”.
Kliem li tenna l-Mexxej Laburista Joseph Muscat quddiem il-folla enormi miġbura fin-Naxxar.
Spjega li ħaddiehor bena kollox fuq gidba. Fuq kalunja fil-konfront tiegħu, ta’ marti u tal-familja tiegħu. Fakkar li hu talab investigazzjoni indipendenti li minnha għandha toħrog il-verità.
Joseph Muscat qal li jekk jinstab imqar l-inqas ħjiel li jien hu, martu jew familti kellhom xi ħaġa milli qed jintqal, jitlaq mall-ewwel. Anki jekk toħroġ ġurnata qabel l-elezzjoni, anki jekk toħrog ġurnata wara l-elezzjoni.
“Ngħid hekk bla biza’ għaliex jien naf li qed ngħid il-verità” qal Muscat.
Fakkar li sfida lil Simon Busuttil biex jagħmel l-istess. Li jgħid li jitlaq jekk jinstab li dak li bbaża ruhu fuqu, li r-raġuni li ħareġ lin-nies fit-toroq ġimgħa qabel sejjaħ l-elezzjoni, li l-affarijiet li fuqhom qed jgħid li jrid jibgħatu l-ħabs huma foloz bħalu.
Simon Busuttil m’aċċettax din l-isfida. M’accettax għaliex jaf li qed jigdeb, qal Muscat. Għaliex jaf li hammeġ isem Muscat fuq gidba u dokumenti foloz. Għaliex jaf li ħammeġ isem il-pajjiż b’gidba minħabba l-għatx għal poter. Għaliex jaf li ikun x’ ikun ir-rizultat ta’ din l-elezzjoni, l-istorja se tiġġudikah bħala politiku bezziegħ, li mhux kapaci jmexxi, u li lest ibiegħ lil pajjiżu fuq gidba.
Żied jgħid li min mhux lest li jerfa’ r-responsabilta’ ta’ dak li jgħid u dak li jagħmel, mhux lest li jkun Prim Ministru. Mhux fit for purpose.
Għaliex Prim Ministru jrid jieħu deċiżjonijiet minn filgħodu sa’ filgħaxija, spjega Muscat. U jrid jerfagħhom dawk id-decizjonijiet.
“Jien nerfgħahom kuljum, bit-tajjeb u hażin. Dak huwa l-ewwel principju tal-governanza. Simon Busuttil mhux lest iżda lanqas jerfa’ r-responsabiltà ta’ dak li bena kollox fuqu. Għaliex il-kelma tiegħu hija tat-tafal.”
Il-Prim Ministru żied jgħid “Iżda jien inwissih. Dak li għamel se jkollu konsegwenzi. U dawk il-konsegwenzi ta’ dak li jafu li ffabbrikaw, se jkollu jġorrhom hu. Id-dnub ma jorqodx. U jkun fejn ikun, ikun x’ ikun, se jgorr ir-responsabiltà ta’ din il-kalunja kontra l-pajjiż”.
Jien konvint li l-poplu se jagħzel is-sewwa. Li mhux se nieqfu nofs triq. Li se jagħżel din il-ħolma Maltija ibbażata fuq erba’ prinċipji.
L-ewwel prinċipju huwa l-mobilta’ socjali. Sa’ erba’ snin ilu kien beda jidħol id-dubju li l-ġenerazzjoni li jmiss mhux bilfors se jkollha ħajja aħjar minn tagħna. Dan id-dubju, qal il-Prim Ministru, tneħħa, għaliex inħoloq il-ġid, ingħata spazju lil min hu ambizzjuz, intwera li l-aspirazzjoni li l-ulied ikunu aħjar minna u aħjar minn kull ġenerazzjoni ta’ Maltin u Għawdxin ta’ kull żmien.
Mall-mobilita’ socjali hemm il-ġustizzja soċjali, spjega l-Prim Ministru li permezz tagħhna il-ġid li jinholoq jasal għand kulhadd, u ħadd ma jaqa’ lura.
Hemm imbagħad il-prinċipju tal-ugwaljanza f’ socjetà kosmopolitana li qed tinħoloq flimkien. U fl-aħħħar nett u fuq kollox, il-Prim Ministru semma l-għaqda.
“Jien mhu se nħalli lil hadd jifred lil poplu bejn north u south, sinjuri u fqar, aħmar u blu. Pajjiżna huwa wieħed u magħqud, bil-kuluri tal-bandiera bajda u ħamra jgħaqqduna. Wara t-tlieta ta’ Ġunju se jkun hemm bżonn sforz kbir ta’ għaqda, u jien lest biex noħrog idejja għal dawk kollha ta’ rieda tajba, biex ngħaqqdu lil pajjiżna u nimxu ‘il quddiem f’ din il-ħolma Maltija” temm jgħid Muscat.
“Huwa ċar aktar minn qatt qabel u huwa ċar għal kulhadd li dan il-moviment mhux biss mexxa lil pajjiżna ‘il quddiem, iżda li għandna l-aħjar ideat biex inkomplu mexjin saħansitra aktar ‘il quddiem. Nafu sew il-pajjiz x’ għandu bżonn. Nafu x’ iridu l-familji. Nafu l-ħtiġijiet tan-negozji. Idejna fuq il-polz tagħkom u għalhekk il-proposti li qed inressqulkom jolqtu fil-laħam il-haj. Għalix nafu li kif bdejna noħolqu middle class gdida, issa se nkunu nistgħu insaħħuha.”
Qal dan il-Prim Minsitru Joseph Muscat waqt mass rally fin-Naxxar.
Il-Prim Ministru qal li l-middle class tista’ tissaħħaħ billi l-Gvern ikun pro business u jinħoloq il-ġid, imbagħad dan il-ġid jitqassam fost kulħadd, b’ mod li tkun imħeġġa l-bżulija u jkun imbottat ‘il quddiem min għandu l-kuraġġ u l-ambizzjoni u ma jaqtax qalbu. B’ hekk ikun ippremjat min jinvesti flusu biex johloq ix-xogħol. B’ mod li nirringrazzjaw lil min irid jara lil uliedu jilħqu aktar minnu. B’ mod li ngħinu lil min verament għandu bżonn.
Il-Prim Ministru qal li llum lanqas hemm dubju f’ moħħ ħadd li dak li qed jipproponi l-Partit Laburista huwa realistiku u jista’ jsir. Huwa ppjanat bir-reqqa u l-pajjiż jaffordjah. Fuq kollox m’ hemmx dubju li kif inżammet il-kelma ta’ Gvern preċedenti, se terġa’ tinżamm jekk il-poplu jagħżel amministrazzjoni Laburista.
