F’dan l-artiklu se tkun tista’ ssegwi dak li jkun qed jiġri fis-sala tal-għadd tal-voti armata apposta fiċ-Ċentru Nazzjonali Laburista fil-Ħamrun.
00:12- Il-voti dubjużi qed jiġu eżaminati mill-Kummissjoni Elettorali tal-PL u rappreżentanti tal-kandidati. Il-voti invalidi huma minimi ħafna u sa issa instabu biss 4 voti invalidi.
00:09- Ir-riżultat ta’ kull kaxxa se jkun qed jiddaħħal f’sistema elettronika sabiex turi r-riżultat b’mod realtime. Dan huwa wieħed mill-iscreens li hawn inslattati madwar is-sala fejn wieħed jista’ jsegwi l-andament tar-riżultati.
00:06- il-proċess tat-tqassim miexi ġmielu f’ambjent kalm fis-sala tal-għadd tal-voti fiċ-ĊNL.
23:56- Beda l-proċess tat-tqassim tal-voti. Il-voti qed jitqassmu fiż-żewġ garżelli tal-kandidati rispettivi. B’kollox hawn 13-il mejda li fuqhom qed jitqassmu l-voti li nħarġu mill-kaxxi li ġew mit-tlettax-il post tal-votazzjoni. Infakkarkom li t-turnout għal din l-elezzjoni kien ta’ 92.5% jiġifieri 16,217 vot. Dan il-proċess ttardja bi kważi siegħa wara li kellha bżonn issir rikonċiljazzjoni fuq kaxxa ta’ Bormla u kaxxa oħra ta’ Għawdex.
22:53- Infakkarkom ukoll li bħalissa fuq l-istazzjonijiet ONE jinsab għaddej programm speċjali mmexxi minn Edward Montebello.
22:52- Iċ-chairperson tal-Kummissjoni Elettorali tal-PL ħabbar li t-tqassim tal-voti fil-garżelli se jibda fil-23:00
22:39- Il-maġġoranza tal-kaxxi infetħu u l-voti inqelbu wiċċhom l-isfel. It-tqassim tal-voti fil-garżelli rispettivi mistenni jibda dalwaqt.
22:14- Il-kaxxi t’Għawdex waslu wkoll u l-aġenti tal-għadd bdew jiftħu wkoll dawn il-kaxxi ħalli ġaladarba jitpoġġew il-voti kollha wiċċhom l-isfel ikun jista’ jibda l-proċess tat-tqassim tal-voti li eventwalment iwassal għall-għadd.
22:12- Din hija l-akbar proċess demokratiku li qatt sar fl-istorja tal-Partit Laburista. Din l-elezzjoni se tkun qed teleġġi d-disa’ mexxej Laburista li fil-jiem li ġejjin mistenni jilħaq l-erbatax-il Prim Ministru ta’ Malta.
22:09- L-andament tal-ftuħ tal-kaxxi jinsab għaddej ġmielu fuq kull mejda. Bħalissa l-voti qed jitpoġġew kollha wiċċhom l-isfel bi preparazzjoni għall-mument li fih jibdew jitqassmu fil-garżelli tal-kandidati rispettivi. Għal din l-elezzjoni ta’ mexxej qed jikkontestaw Robert Abela u Chris Fearne.
21:40- Fiċ-Ċentru Nazzjonali Laburista nġabru wkoll ġurnalisti mill-kmamar tal-aħbarijiet lokali kollha kif ukoll numru ta’ kmamar tal-aħbarijiet barranin li wkoll qed isegwu b’interess l-andament tal-għadd tal-voti.
21:11- Fiċ-ĊNL komplew jaslu aktar kaxxi tal-voti mill-kmamar tal-votazzjoni.
21:08- Is-sitwazzjoni fiċ-ĊNL hija waħda kalma u organizzata ħafna. L-aġenti tal-kandidati jinsabu miġbura wara l-imwejjed fejn se jkunu qed jingħaddu l-voti filwaqt li dawk responsabbli mill-għadd tal-voti jinsabu f’żona ristretta fuq quddiem tas-sala. B’kollox hawn tlettax-il mejda tal-għadd b’4 aġenti tal-għadd fuq kull mejda.
21:01- L-għadd tal-voti mistenni jibda ġaladarba jaslu l-kaxxi kollha fiċ-Ċentru Nazzjonali Laburista inkluż dawk t’Għawdex. Għalissa l-voti maħruġa mill-kaxxi li nfetħu qed jitpoġġew kollha wiċċhom l-isfel. Għall-ewwel darba f’din l-elezzjoni l-Partit Laburista se jkun qed juża sistema elettronika li taħdem b’mod real time. Bis-saħħa ta’ din is-sistema malli tingħalaq il-kaxxa r-riżultat tagħha joħroġ b’mod immedjat.
20:50- Jibdew jinfetħu l-ewwel kaxxi tal-‘advance voting’
20:25- Il-Kummissjoni elettorali tal-PL tħabbar turnout uffiċċjali ta’ 92.5%
L-ewwel distrett elettorali kellu turnout ta’ 91%, it-tieni distrett kellu turnout ta’ 94%, it-tielet distrett kellu turnout ta’ 93%, ir-raba distrett kellu turnout ta’ 93%, il-ħames distrett kellu turnout ta’ 93%, is-sitt distrett kellu turnout ta’ 93%, is-seba’ distrett kellu turnout ta’ 90%, it-tmien distrett kellu turnout ta’ 92%, id-disa’ distrett kellu turnout ta’ 90%, l-għaxar distrett kellu turnout ta’ 94%, il-ħdax-il distrett kellu turnout ta’ 96% it-tnax-il distrett kellu turnout ta’ 89% u t-tlettax-il distrett kellu turnout ta’ 94%. L-advance voters f’Malta u Għawdex ivvotaw kollha.
20:00- Jingħalqu l-kmamar tal-votazzjoni kollha madwar Malta u Għawdex.
