one.com.mt se jkun qed iżommkom aġġornati kontinwament bl-aħħar żviluppi mill-Istamperija tal-Partit Nazzjonalista f’Tal-Pietà. Matul il-jum tas-Sibt vvutaw l-aħħar round ta’ tesserati f’elezzjoni qalila bejn il-Kap attwali Adrian Delia u l-kandidat tal-establishment Nazzjonalista Bernard Grech.
23:44 – Bernard Grech jindirizza konferenza stampa.
https://www.one.com.mt/2020/10/04/bil-filmat-fl-ewwel-messagg-tieghu-ta-kap-tal-pn-jghid-li-l-impjiegi-qeghdin-friskji/
23:15 – Bernard Grech jinħatar Kap tal-PN mill-President tal-Konvenzjoni Ġenerali Ċensu Galea. Fil-ħin li ġej Grech mistenni jagħmel l-ewwel diskors tiegħu bħala Kap.
23:05 – Bernard Grech jidħol fid-Dar Ċentrali. Hekk kif daħal fil-binja reġgħet qamet kommossjoni bl-uffiċċjali tas-sigurta jkollhom jgħalqu l-bieb ta’ barra tad-Dar Ċentrali.
22:58 – Bernard Grech ġab 12,633 vot. Ċensu Galea mistenni jħabbar dan ir-riżultat fejn waqt li jagħlaq il-Konvenzjoni Ġenerali se jkun qed jikkonferma lil Bernard Grech bħala l-Kap il-ġdid tal-Partit Nazzjonalista.
22:53 – Edwin Vassallo, wieħed mill-ftit deputati li baqa’ dejjem leali lejn Adrian Delia rringrazzjah għall-irġulija tiegħu u lealtà li wera. Huwa rringrazzjah ukoll talli huwa mhux se jagħmel dak li għamlu lilu tul dawn it-tliet snin.
22:48 – Jibda l-għadd tal-voti miċ-chairman tal-Kummissjoni Elettorali tal-PN Peter Fenech. Adrian Delia ġab 5,622 vot u kien hemm 77 vot invalidu. Il-voti ta’ Bernard Grech għadhom jingħaddu.
22:35 – Diversi partitarji quddiem id-Dar Ċentrali spiċċaw jiġġieldu hekk kif il-Kap uxxenti Adrian Delia ħareġ mill-bini. Filmati ta’ ONE News qabdu din il-kommossjoni li matulha saħansitra nġibed xi xagħar tal-partitarji li spiċċaw jitqabdu ma’ xulxin. Il-filmati wrew ukoll partitarji jippruvaw iħebbu għall-uffiċċjali tal-Pulizija preżenti biex jikkalmaw is-sitwazzjoni.
22:10 – Id-Deputat Marlene Farrugia li kienet parti mill-koalizzjoni ma’ Simon Busuttil ukoll awgurat lil Bernard Grech bħala Kap tal-PN.
21:45 – Fid-Dar Ċentrali dehru deħlin numru ta’ esponenti mill-fazzjoni li dejjem opponiet lil Delia fosthom Karol Aquilina u Beppe Fenech Adami.
21:25 – Adrian Delia jibda jindirizza konferenza stampa. F’konferenza tal-aħbarijiet, Adrian Delia kkonċeda t-telfa fl-elezzjoni għal Kap tal-Partit Nazzjonalista. Huwa awgura lil Bernard Grech u qal li se jkun leali lejh. Qal li r-rivoluzzjoni li ried jagħmel fil-Partit Nazzjonalista kienet prematura u kien hemm wisq elementi konservattivi fil-partit li riedu jirreżistuha. Aktar dettalji fil-link.
https://www.one.com.mt/2020/10/03/bil-filmat-ir-rivoluzzjoni-li-ridt-naghmel-fil-pn-irrezistewha-l-elementi-konservattivi-adrian-delia/
21:20 – Jibda jiċċirkola fuq Whats App filmat ta’ Bernard Grech jiċċelebra r-rebħa tiegħu fuq il-Kap uxxenti Adrian Delia. Flimkien ma Grech dehru numru ta’ esponenti Nazzjonalisti fosthom Chris Said, Beppe Fenech Adami, Karol Aquilina u diversi esponenti tal-MŻPN li tul dawn l-aħħar xhur kienu qed jitolbu lil Delia biex iwarrab.
21:04 – Fl-isfond ta’ ċapċip u għajjat min-numru ta’ partitarji Adrian Delia wasal fid-Dar Ċentrali fejn fil-ħin li ġej mistenni jindirizza konferenza tal-aħbarijiet.
21:01 – Quddiem id-Dar Ċentrali jibdew jinġabru nuru ta’ partitarji ta’ Bernard Grech.
20:47 – Fost l-ewwel esponenti mill-establishment Nazzjonalista li awguraw lil Grech kien hemm Simon Busuttil li awgura lil Bernard Grech għar-rebħa tiegħu fuq Adrian Delia.
20:40 – Fil-konferenza tal-aħbarijiet li se jkun qed jindirizza Adrian Delia huwa se jkun qed jikkonċedi t-telfa. Minn informazzjoni li għandna Bernard Grech se jkun qed jinżel fis-sala tal-għadd tal-voti u wara se jindirizza l-ġurnalisti. Dan kollu se jseħħ wara li jintemm il-proċess tal-għadd tal-voti.
20:26 – Fil-minuti li ġejjin Adrian Delia u Bernard Grech se jindirizzaw żewġ konferenzi tal-aħbarijiet separati.
20:20 – Bi Chris Said u Karol Aquilina warajh Bernard Grech deher fl-ewwel filmat imtella’ online. Huwa rringrazzja wkoll lil kull min ivvutalu u kif ukoll lin-nies li minkejja akkużi serji l-dwar l-evażjoni tat-taxxa huma baqgħu ta’ spalla għalih.
20:15 – Iż-żewġ kandidati għal din il-kariga kitbu mesaġġi fuq is-siti soċjali tagħhom ta’ Facebook. Adrian Delia kiteb li huwa kburi li huwa Malti u rringrazzja lil dawk kollha li vvutawlu. Ftit tal-mumenti wara Bernard Grech kiteb biex jirringrazzja lil votanti u kiteb li dan kien l-ewwel pass.
20:00 – L-ewwel indikazzjonijiet qed juru li Bernard Grech għandu vantaġġ fuq Adrian Delia.
19:50 – Jibda l-proċess ta’ tqassim tal-voti fil-garżelli taż-żewġ kandidati. Kif jitlesta dan il-proċess mistenni jibda l-għadd tal-voti.
19:22 – Fil-ħin li ġej mistenni jibda l-proċess tas-sorting. Il-ġurnalisti preżenti huma kostretti jsegwu dan il-proċess minn fuq sett tat-televiżjoni minn ġewwa kamra iżolata fid-Dar Ċentrali għax huma l-ġunalisti tan-Net biss li tħallew viċin is-sala.
19:04 – Wara aktar minn sagħtejn li nbeda l-proċess tal-għadd tal-voti l-ġurnalisti tħallew jidħlu biex isegwu dan il-proċess tant delikat.
18:58 – Apparti l-preżenza qawwija ta’ Pulizija, quddiem id-Dar Ċentrali qed tiżdied ukoll il-preżenza ta’ uffiċjali ta’ sigurtà tal-PN.
18:39 – L-ogħla turnout ġiet rreġistrata fis-Swieqi b’89% u l-anqas turnout ġiet rreġistrata fiż-Żurrieq u Ħal Luqa bi 82%.
18:36 – B’kollox hemm 40 kaxxa tal-vot minn 18-il post tal-votazzjoni. Il-maġġoranza tal-kaxxi infetħu fuq it-tmien imwejjed, bil-voti ġew mqiegħda wiċċhom ‘l isfel f’pakketti ta’ 50.
18:30 – Il-preżenza tal-Pulizija kompliet tiżdied hekk kif sorsi fi ħdan l-istamperija qed jgħidu li hemm sens ta’ arja tqila u inċertezza kbira.
17:30 – Jibdew jinfetħu l-kaxxi bil-voti qed jiġi mitfugħa wiċċhom ‘l isfel.
17:10 – B’kollox kien hemm aktar minn 3,220 tesserat li baqgħu id-dar u ma vvutawx f’din l-elezzjoni.
16:59 – Matul il-jum tas-Sibt ivvutaw biss 9% tal-votanti eliġibbli. Biex b’hekk it-turnout għal din l-elezzjoni għal Kap kien ta’ 85%. Dan jikkonferma dak li għedna ftit tal-ħin ilu li f’din l-elezzjoni vvutaw mal-għaxra fil-mija inqas mill-elezzjoni għal Kap ta’ tliet snin ilu.
16:48 – Il-bini tal-istamperija jinsab ċirkondat bil-barikati tal-Pulizija. Il-bieb prinċipali huwa msakkar. Il-kaxxi tal-voti qed jidħlu fis-sala tad-Dar Ċentrali mill-bieb tal-ġenb.
16:43 – Il-Kap tal-Kummissjoni Elettorali Nazzjonalista Peter Fenech saħaq li r-riżultat mistenni joħroġ bejn id-21:30 u l-23:00 tas-Sibt filgħaxija. ONE News se jkun qed iwassal ukoll kollegamenti diretti minn quddiem id-Dar Ċentrali fil-bulettin tal-aħbarijiet tas-19:30.
16:25 – Fl-ewwel żviluppi li ħarġu mill-Kummissjoni Elettorali tal-Partit Nazzjonalista jirriżulta li 85% tat-tesserati eliġibbli vvutaw. Dan stqarru l-Kap tal-Kummissjoni Elettorali Nazzjonalista Peter Fenech fuq l-istazzjon tal-partit. Dan ifisser li skont l-ewwel indikazzjoni li tat il-Kummissjoni Elettorali Nazzjonalista stess, ivvutaw mal-għaxra fil-mija inqas mill-elezzjoni għal Kap ta’ tliet snin ilu.
16:05 – Il-votazzjoni għal Kap tal-Partit Nazzjonalista għalqet ftit tal-ħin ilu.
