‘Create your Shape – Discover your Potential’ huwa l-isem ta’ workshops organizzati b’suċċess minn Aġenzija Żgħażagħ bil-għan li ż-żgħażagħ jitħarrġu f’abbiltajiet extrakurrikulari filwaqt li jiskopru talenti differenti li għandhom.
Is-Segretarju Parlamentari għaż-Żgħażagħ, ir-Riċerka u l-Innovazzjoni Keith Azzopardi Tanti saħaq dwar l-importanza ta’ attivitajiet simili għaż-żgħażagħ sabiex jespandu t-talenti tagħhom u jemmnu aktar fihom infushom.
Hu tenna li l-edukazzjoni ma tiqafx fil-bankijiet tal-iskola, iżda huwa importanti ferm li ż-żgħażagħ ikomplu jitħarrġu f’suġġetti extrakurrikulari bħal dawn.
Tkellmet ukoll il-Kap Eżekuttiv ta’ Aġenzija Żgħażagħ, Miriam Theuma u spjegat li Aġenzija Żgħażagħ trid tkun minn ta’ quddiem biex tagħti appoġġ liż-żgħażagħ lokali.
Hija tenniet li attivitajiet simili huma importanti ferm biex jagħtu fiduċja liż-żgħażagħ li għalkemm forsi ma jħossuhomx komdi fi studji akkademiċi, xorta waħda għandhom potenzjal kbir li jkollhom suċċess fil-futur.
Il-kampanja ‘Create your Shape – Discover your Potential’ minn Aġenzija Żgħażagħ se tkompli għaddejja b’riklamar fuq il-mezzi tax-xandir, il-midja soċjali u anke f’postijiet oħra pubbliċi.
