Siġġijiet tar-roti li jgħinu persuni b’diżabilita’ jinżlu l-baħar, rampi ta’ aċċess, mekkaniżmu ieħor u passaġġi għandhom l-għan li joffru aċċess aħjar għall-bajjiet ta’ Malta u Għawdex. Dawn ġew inawgurati propju dalgħodu matul konferenza stampa li saret fuq il-bajja tal-Għadira, l-Mellieħa.
Is-CEO tal-MTA, Mr.Paul Bugeja, spjega li l-awtorita’ tat-Turiżmu b’kollaborazzjoni mal-Ministeru tat-Turiżmu, għamlu ħidma kontinwa biex isir titjieb fl-aċċessibilita’ tal-bajjiet. Fil-bajja tal-Mellieħa saru passaġġi speċjali li jwasslu mill-bankina sal-baħar. Dawn ir-rampi ntlaqtu tajjeb ħafna u l-MTA stqarret li se jkunu qed jiżdiedu f’bajjiet oħra.
Sar ukoll investimenti f’ 10 siġġijiet tar-roti, li jistgħu saħansitra jidħlu fl-ilma. Ġew introdotti wkoll żewġ mekkaniżmi li jagħmlu l-ħajja ta’ persuni li għandhom diffikultajiet fil-mobilta’ aktar faċli biex ikunu jistgħu jaċċessaw il-baħar f’bajjiet fejn hemm il-ġebel.
Mr.Bugeja enfasizza li l-aċċessibilità hija dritt li għandu jgawdu minnu kulħadd, u li l-MTA tqis li huwa l-obbligu tal-awtorita’, li tipprovdi l-aħjar aċċess possibbli għal kulħadd. Huwa rrefera għall-Organizzazzjoni Dinjija tas-Saħħa (WHO) u li rapporti jiddikjaraw li 15% tal-popolazzjoni tad-dinja hija stmata li tgħix b’xi forma ta’ ‘diżabilità. L-Organizzazzjoni tan-Nazzjonijiet Uniti tat-Turiżmu Dinji (UNWTO) huwa impenjat b’mod attiv fil-promozzjoni tal-kunċett ta ‘aċċessibbiltà għal kulħadd bħala prinċipju ċentrali ta’ gwida għall-istrateġiji turistiċi kollha.
“Is-suġġeriment oriġinali li ħeġġeġ l-introduzzjoni ta’ dawn il-faċilitajiet beda propju minn post fuq is-sit soċjali Facebook li għamlet is-Sinjura Kira Muscat, hi kienet ikkummentat dwar kif dawn il-faċilitajiet jistgħu jagħmlu differenza enormi għall-persuni bi problemi ta ‘mobilità. MTA ħadet il-parir, għamlet riċerka tal-possibbiltajiet, li wasslu għal-azzjoni konkreta. Dak li hu tajjeb dwar faċilitajiet bħal rampi u passaġġi hija li mhumiex biss ta’ benefiċċju għall-persuni b’diżabilità permanenti, iżda wkoll għall-anzjani, familji b’pushchairs jew strollers, u l-pubbliku b’mod ġenerali, kemm turisti u nies lokali” stqarr is-Sur Bugeja.
Din l-inizjattiva ġiet implimentata mill-Awtorità Maltija tat-Turiżmu b’kollaborazzjoni mal-KNPD u kunsilli lokali varji.
