In-nuqqas ta’ mediċini fl-Unjoni Ewropea u t-titjib fl-aċċess għall-mediċini innovattivi, partikolarment fi swieq żgħar bħal Malta, kienu fiċ-ċentru tad-diskussjoni bejn id-Deputat Prim Ministru u Ministru għas-Saħħa, Chris Fearne, u l-Kummissarju Ewropew għas-Saħħa u s-Sigurtà fl-Ikel, Stella Kyriakides, waqt żjara uffiċjali f’Malta.
Id-Deputat Prim Ministru, Chris Fearne, laqa’ b’sodisfazzjon il-ħidma tal-Kummissarju sabiex jiġu indirizzati dawn il-problemi u esprima l-appoġġ tiegħu għall-għanijiet tal-proposti leġiżlattivi adottati riċentament mill-Kummissjoni Ewropea biex jiġi aġġornat il-qafas farmaċewtiku.
Fost l-oħrajn, l-għan ta’ dawn il-proposti huwa li jitjieb l-aċċess għall-mediċini madwar l-Unjoni Ewropea u li jinħoloq suq komuni tal-farmaċewtika fl-Unjoni.
“Kellna taħditiet biex naraw kif mediċini jistgħu jkunu iżjed aċċessibbli għall-pazjenti, kemm Ewropej u anke żgħar bħal Malta, kif ukoll jiġu mmanifatturati b’mod aktar affordabbli biex jaslu għand il-pazjenti tagħna b’mod aħjar. Dan qed nagħmluh flimkien mal-kollegi tagħna, Ministri tas-Saħħa, madwar l-Ewropa biex inkunu ċerti li għax-xhur u s-snin li ġejjin il-ħażna u s-supply tal-mediċi tibqa’ kostanti u bi prezzijiet affordabbli.”
Deputat Prim Ministru Chris Fearne
Chris Fearne sostna li, għall-benefiċċju tal-pazjenti kollha fl-Unjoni Ewropea, huwa essenzjali li jitkissru l-ostakli attwali fis-suq intern.
Il-Kummissarju Kyriakides u d-Deputat Prim Ministru Chris Fearne qablu wkoll li, għal titjib fl-aċċess għall-mediċini, hija meħtieġa wkoll ħidma li tmur lil hinn mil-leġiżlazzjoni proposta u li tista’ tiġi indirizzata aħjar permezz ta’ inizjattivi kkoordinati fost l-Istati Membri.
Il-Kummissarju Stella Kyriakides sostniet li Malta ilha tappoġġja bis-sħiħ il-viżjoni tal-Unjoni Ewropea tas-Saħħa sa mill-bidu. Qalet ukoll li Malta kienet eżemplari fil-mod kif mexxiet waqt il-pandemija tal-COVID-19, meta kienet ukoll sieħeb ewlieni fil-livell Ewropew.
Tul iż-żjara f’Malta l-Kummissarju Ewropew żaret ukoll il-kumpaniji Medichem u Combino Pharm, akkumpanjata mid-Deputat Prim Ministru.
Id-Deputat Prim Ministru, kif ukoll il-Kummissarju Ewropew, ipparteċipaw ukoll fil-konferenza annwali tal-Medicines for Europe li ġiet organizzata f’Malta, li ffukat fuq l-azzjonijiet ewlenin meħtieġa sabiex tinbena Ewropa aktar b’saħħitha permezz tal-implimentazzjoni tal-istrateġija Ewropea tal-farmaċewtika kif ukoll ta’ strateġija industrijali aġġornata.
