Il-Ministru għall-Ġustizzja Owen Bonnici qal li l-abbozz ta’ liġi jemenda l-Att dwar iż-żwieġ u liġijiet oħra huwa abbozz storiku u se jibqa’ mniżżel fl-istorja tal-Parlament. Huwa qal li hemm min hu konvint u hemm min mhux konvint jew hu konvint ftit inqas, bħall-Oppożizzjoni, li qalet li se tivvota favur.
Huwa rrifera għad-diskors li għamel il-kelliem Nazzjonalista David Agius li t-ton li uża, il-kritika li għamel u l-eseġerazzjonijiet li semma jagħtu l-impressjoni li huwa kontra l-abbozz.
Dan l-abbozz huwa wieħed b’saħħtu li jipprovdi għall-ugwaljanza li hi għall-qalb il-familja Maltija, li tagħti dinjità lil kulħadd u li kulħadd ikollu l-possibilita li jirnexxi. Isaħħaħ ukoll l-istituzzjoni taż-żwieġ, li hu “pedament importanti li jeħtieġ nundukrawh u mmexxuh ’l quddiem”.
Ħafna mill-kritika ta’ David Agius kienet dwar nuqqas ta’ konsultazzjoni mill-gvern u li fl-abbozz il-kliem mara u raġel kienu se jinbidlu għal konjuġi. Huwa qal li dan hu asssurd u qal li fil-kumitat, l-Oppożizzjoni se tressaq emendi.
Id-deputat kap tal-oppożizzjoni Mario de Marco qal,li waqt li l-astensjoni dwar l-abbozz dwar l-unjoni ċivili kienet l-aktar ġurnata iebsa fil-karriera politika tiegħu, li llum jivvota favur iż-żwieġ bejn iż-żewġ sessi se tkun waħda mill-aktar faċli li jagħmel dan.
Huwa għamel apoloġija għall-fatt li l-Partit Nazzjonalista, fil-passat, naqas li jidhem sew u jirrispetta l-ħtiġijiet tal-komunità LGBTQI iżda dan l-abbozz juri kemm hu bżonjuż li jinbidlu l-liġijiet biex jirriflettu l-bidliet soċjali.
Dawn li huma mħassba li l-liġi tmur kontra l-prinċipji fundamentali tal-partit, qal, qed jinsew li l-politika Demo-Krisjana hija msejjsa fuq id-dritt talż’ kull individwu, drittijiet li jridu jiġu rispettati minn kulħadd.
Id-dibattitu se jkomplu fil-5 ta’ Lulju.
Illum filgħodu, l-Kamra se tiddiskuti l-estimi finanzjarji tal-Awtorità tas-Saħħa u Sigurtà fuq il-Post tax-Xogħol.
