Abbatini Maltin se jservu fuq l-altar tal-Papa fil-Bażilika ta’ San Pietru 

Fil-Milied, grupp ta’ tnax-il abbat minn parroċċi differenti madwar Malta se jkunu qed jagħtu sehemhom fl-Altare della Confessione, l-altar ewlieni tal-Bażilika ta’ San Pietru fil-Vatikan fejn normalment tkun iddedikata biss għall-quddiesa li tkun immexxija mill-Papa.  

Iżda din is-sena, il-Papa ta ċ-ċans lill-Kardinal Mauro Gambetti, Arċipriet tal-Bażilika, biex jiċċelebra quddiesa minfloku.  

Din hi opportunità ta’ darba matul dan iż-żmien tal-Milied, li se jkun qed joffri dan iċ-ċans uniku lill-abbatini li jkunu viċin il-fdalijiet ta’ San Pietru, l-ewwel Papa, li jinsabu taħt l-istess altar.