Tħabbru l-finalisti għall-edizzjoni ta’ din is-sena ta’ SportMalta Awards – Għażliet Sportivi Nazzjonali; avveniment organizzat b’mod konġunt minn SportMalta u l-Għaqda Ġurnalisti Sports.
Għall-edizzjoni ta’ din is-sena ġew ikkonfermati l-awards tradizzjonali; dawk ta’ sportiv, sportiva, żagħżugħ, żagħżugħa, tim, kowċ u uffiċjal tas-sena, bis-soliti rikonoxximenti jmorru għand l-atleti ta’ Special Olympics Malta u l-avveniment tas-sena. Magħhom il-People’s Choice Award li jintagħżel b’votazzjoni onlajn.
Il-finalisti ġew magħżula b’votazzjoni li saret mill-ġurnalisti sportivi membri fl-Għaqda Ġurnalisti Sports.
SportMalta Awards – Għażliet Sportivi Nazzjonali għandhom storja ta’ ’l fuq minn 57 sena fejn dawn l-għażliet żviluppaw minn sena għal sena. Sa mill-ewwel edizzjoni, li rat lil Wilfred Pirotta fl-1960 jirbaħ l-unur tal-Isportiv tas-Sena, sal-lum fejn dan l-avveniment kiber fil-popolarità tiegħu kemm bil-parteċipazzjoni tal-Assoċjazzjonijiet u Federazzjonijiet, il-ġurnalisti tal-isport u anke l-pubbliku ġenerali.
Il-finalisti tħabbru waqt attività li ġiet indirizzata mis-Segretarju Parlamentari għaż-Żgħażagħ, Sport u Għaqdiet tal-Volontarjat Clifton Grima, li bi pjaċir innota s-suċċessi miksubi fl-2017 u l-investiment tal-Gvern fl-isport li qed iħalli l-frott. Gvern li fi kliemu, sena wara sena dejjem qed jagħti iktar fondi mhux biss lill-Kumitat Olimpiku Malti iżda anke assistenzi permezz ta’ SportMalta f’diversi skemi tagħha.
Żied li l-Gvern jinsab kommess li anke għas-snin li ġejjin ikompli jinvesti fl-isport, fejn mhux biss se jkomplu jitjiebu l-faċilitajiet sportivi, iżda fil-ġimgħat li gejjin se jkun inawgurat shooting range ta’ livell internazzjonali.
Fl-istess serata wkoll ġie ffirmat grant agreement bejn SportMalta u l-Għaqda Ġurnalisti Sports, sabiex l-iSportMalta Awards jibqa’ jiġi organizzat b’mod konġunt għat-tliet snin li ġejjin.
SportMalta Awards – Għażliet Sportivi Nazzjonali jsiru nhar is-Sibt 17 ta’ Frar 2017 fis-Sala tal-Konferenzi ta’ Dar il-Mediterran il-Belt Valletta u s-serata se tixxandar diretta fuq TVM2 bit-trasmissjoni tibda fit-8.15pm.
