Għall-ħabta tat-tmienja u nofs ta’ filgħodu it-tliet irġiel akkużati bil-qtil tal-blogger Daphne Caruana Galizia ddaħħlu fil-bini tal-Qorti bil-għan li tibda tinstemgħa x-xhieda fil-konfront tagħhom. Dawn kienu qed jiġu skortati minn numru ta’ karozzi tal-Pulizija fosthom vann tas-sezzjoni tal-Special Intervention Unit tal-korp tal-Pulizija.
Ftit aktar minn siegħa mill-wasla tagħhom ġewwa l-binja tal-Qorti, l-aħwa George u Alfred Degiorgio flimkien ma Vince Muscat daħlu ġewwa l-awla fil-Qorti. Preżenti għal din is-seduta hemm il-familjari ta’ Caruana Galizia
Il-Maġistrat Donatella Frendo Dimech qalet lill-akkużati li biex jiġi salvagwardjat il-proċess ġudizzjarju huwa fl-interess tagħhom li jkollhom avukat kull wiehed. Meta staqsiet lill-akkużati jekk iridux avukat kull wieħed, it-tliet irġiel aċċettaw u l-Qorti pprovdiet tliet avukati, wieħed assenjat ma’ kull akkużat. Dr Martin Fenech se jkun qed jirrapreżenta lil vince Muscat, magħruf bħala l-Koħħu, Dr Fransina Abela se tirrapreżenta lil Alfred Degiorgio magħruf bħala l-Fulu u Dr Benjamin Valencia se jkun qed jirrapreżenta lil George Degiorgio magħruf bħala ċ-Ċiniż. Hekk kif ġew allokati avukat it-tliet akkużati reġgħu nħarġu mill-awla sabiex ikunu jistgħu jitkellmu mal-avukati tagħhom. Fil-ġimgħat li għaddew kien rapurtat li minkejja li saru sforzi sabiex jinstabu avukati tal-kriminal sabiex jiddefendu lit-tliet akkużati ħadd kien lest li jiddefendihom.
Wara dikjarazzjoni mill-Maġistrat Donatella Frendo Dimech l-akkużati permezz tal-avukati tagħhom talbu sabiex tinbidel il-Maġistrat. Hija qalet li fit-tmeninijiet hija kienet fil-klassi ta’ waħda mill-aħwa ta’ Caruana Galizia u hija qalet li gieli awguraw lil xulxin ghall-għeluq sninhom u fil-passat anke saru xi skambji ta’ kondoljanzi għall-mewt ta’ familjari miż-żewġ familji. Madankollu l-prosekuzzjoni oġezzjonat li jinbidel il-Maġistrat. Il-Prosekuzzjoni qalet li l-Maġistrat m’għandux jinbidel għall-fatt li l-Magistrat għax kienet tat kondoljanzi lill-familjari tal-vittma. Il-Maġistrat qalet li minkejja li legalment ma kienetx obbligata li taghmel dan, il-qorti ħasset li għanda tagħmlu. L-avukatessa Therese Comodini Cachia li qed tidher bħala parte civile qablet mal-prosekuzzjoni u qalet li Daphne Caruana Galizia kienet persuna pubblika u għalhekk huwa diffiċli li b’xi mod jew ieħor qatt ma’ kien hemm konessjonijiet magħha jew il-familjari tagħha. l-Qorti se tkun qed tisma dak preżentat dalgħodu mill-avukati difensuri u f’12:00 mistennija terġa titkompla s-seduta sabiex jiġi deċiz jekk il-Maġistrat għandix tinbidel.
Il-Magistrat Frendo Dimech qalet li kien hemm qbil anke mid-difiza li ma jezistu l-ebda ragunijiet legali sabiex il-Magistrat tinbidel, li bl-ebda mod lill-magistrat tagixxi bi’ I preġudizzju iżda li dawn qed inisslu dubji fost l-imputati. Hija għamlet referenza għal diversi każijiet differenti iżda b’ talbiet simili, fosthom dik tal-persuni abbużati sesswalment f’ Dar San Ġuzepp sabiex il-kaz ma’ jinstemmax quddiem l-Imhallef JR. Micallef, izda għamlet referenza wkoll għal diversi każijiet oħra saħansitra fil-Parlament Ewropew.
Kien għalekk li l-Maġistrat talbet sabiex din il-kumpilazzjoni tgħaddi f’ idejn ir-reġistratur tal-Qorti sabiex jigi appuntat Maġistrat ieħor. Wara dan l-aħħar żvilupp l-akkużati mistennija jerggħu jittieħdu fil-Faċilita Korrettiva ta’ Kordin sakemm il-Qorti tappunta Maġistrat ieħor. Bħalissa fuq in-naħa ta’ wara tal-binja tal-Qorti reġgħu inġabru vetturi tal-Faċilita Korrettiva ta’ Kordin kif ukoll minn tal-Special Intervention Unit li se skortaw lill-akkużati lura lejn il-ħabs.
