Il-Prim Ministru Joseph Muscat iddikjara li ġaladarba l-persuni suspettati bil-qtil ta’ Daphne Caruana Galizia jitressqu l-Qorti, il-kumpilazzjoni tax-xhieda mistennija tieħu biss ftit ġimgħat.
Konxju mill-mistoqsijiet li għandu l-pubbliku b’rabta mal-aħħar żviluppi, meta wieġeb il-mistoqsijiet fuq Facebook waqt “Gvern Li Jisma’”, il-Prim Ministru Joseph Muscat qal li għalkemm jixtieq iwieġeb, issa huwa l-mument li wieħed jistenna’ ftit.
Innota l-mod professjonali li l-Forzi tal-Ordni mxew bih fl-aħħar jiem, bi pjan imħejji b’reqqa kbira li wassal biex jiġu arrestati għaxar persuni.
Intant, bħalissa l-Prim Ministru għadu qed iwieġeb il-mistoqsijiet tal-pubbliku dwar bosta suġġetti.
Ewlenin fosthom kien hemm il-kwistjoni tal-marijuana mediċinali, b’Joseph Muscat iħabbar li sa Frar tas-sena d-dieħla, mistennija tgħaddi u tidħol fis-seħħ il-liġi dwarha.
Dwar l-Air Malta nnota l-ftehimiet kollettivi li ġew iffirmata fl-aħħar jiem u appella biex il-unjins li baqa’ jilħqu ftehim għall-ġid tal-ħaddiema, hekk kif jemmen li hemm futur sabiħ jistenna għal-linja nazzjonali tal-ajru.
Dwar is-suq tax-xogħol, il-Prim Ministru nnota li pajjiżna għandu rata rekord ta’ nies jaħdmu, u l-pass li jmiss huwa li n-nies jibdew jitħallsu iktar.
Dan fi sfond ta’ Gvern li wara ħamsa u għoxrin sena żied il-paga minima, u ta inċentivi – bħall-inwork benefit u childcare b’xejn, biex iktar nies joħorġu jaħdmu.
