Wieħed mill-aħħar ġurnalisti li ngħaqdu fil-kamra tal-aħbarijiet ta’ ONE, li kull ma jmur qiegħda tissaħħaħ, kien irrikonoxxut b’wieħed mill-unuri fis-serata finali tal-Malta Journalism Awards. Melvic Zammit, rebaħ dan l-unur għall-xogħol li għamel fil-pubblikazzjonijiet tal-Union Print sa ftit tal-ġimgħat ilu.
“Ġejt rikonoxxut għall-‘Aħjar Użu tal-Ilsien Malti fil-Ġurnaliżmu Stampat’ fis-serata tal-Malta Journalism Awards. Niddedika dan l-unur lit-teatru tal-ħajja li kien l-ewwel għajn li xrobt minnu u lill-għażiża nannti li għallmitni dak kollu li ma sibtx fil-kotba,” kiteb Zammit fuq facebook tiegħu wara s-serata finali.
Illum Zammit huwa wieħed mill-persuni ffokati fuq il-proġett one.com.mt li fi ftit ġimgħat kiseb popolarità enormi u huwa parti minn tim kbir ta’ ġurnalisti li jipproduċu bulettini tal-aħbarijiet mill-aqwa u jassistu f’uħud mill-iktar programmi b’saħħithom ta’ ġrajjiet kurrenti.
