Ritratt li jgħid storja mhux tas-soltu

• GWARDJAN U RESIDENT TAL-FAĊILITÀ KORRETTIVA TA’ KORDIN SPIĊĊAW KOLLEGI F’TIM

F’dan ir-ritratt jidhru George Falzon u Andrew Formosa; it-tnejn bl-istess flok tal-istess tim tal-futbol. Dak ta’ MSIDA ST JOSEPH FC. Iżda dik li tidher relazzjoni normali bejn żewġ membri ta’ tim tal-futbol hija relazzjoni li l-għeruq tagħha jgħidu storja mill-isbaħ. Dan għaliex dawn iż-żewġ irġiel iltaqgħu fil-Faċilità Korrettiva ta’ Kordin. 

Dan hekk kif Andrew Formosa kien għal xi żmien resident tal-Faċilità Korrettiva ta’ Kordin fejn skonta sentenza u beda ħajja ġdida, biex illum huwa integra sew fis-soċjetà u mhux biss qed igawdi lill-familja tiegħu iżda għandu ċ-ċans li jilgħab dik il-logħba futbol li tant hi għal qalbu.

Fiż-żmien li kien fil-Faċilità Korrettiva ta’ Kordin, George Falzon kien jaħdem bħala gwardjan fl-istess Faċilità, fejn kien jilgħab logħba futbol ma’ Andrew hekk kif mhux l-ewwel darbali ġiet organizzata logħba ta’ ħbiberija bejn il-gwardjani u r-residenti.

Iżda żgur li ħadd qatt ma kellu jgħidilhom li minn avversarji fil-futbol kienu se jispiċċaw jilbsu l-istess flok u jilagħbu fl-istesstim tal-futbol barra l-ħitan tal-Faċilità.

Dwar dan George spjegalna għalfejn ma’ Andrew, anke bejn il-ħitan tal-ħabs, dejjem kien hemm rispett u ħbiberija.

“Lil Andrew sirt nafu meta kont naħdem bħala Uffiċjal Korrettiv fil-Facilità Korrettiva ta’ Kordin. Kien resident eżemplari, jimxi mar-regoli u jirrispetta l-awtorità, għalhekk kellu rapport tajjeb mhux miegħi biss, imma anke ma’ uffiċjali oħra.”

Tal-istess fehma kien Andrew, li stqarr mal-gazzetta KullĦadd li f’George sab il-ħabib li kellu bżonn fi żminijiet diffiċli.

“Meta George kien gwardjan u jiena resident, kemm-il darba lgħabna kontra xulxin imma dejjem tani pariri tajbin.”

Iżda kif it-toroq tal-gwardjan u r-resident reġgħu ltaqgħu flimkien? Dan hekk kif kemm George u kemm Andrew ingħaqdu ma’ timijiet Maltin stabbiliti. Hemmhekk, bdew jiltaqgħu bħala avversarji hekk kif kienu jilagħbu ma’ żewġ timijiet differenti. Kif spjegalna Andrew.

“Kif ħriġt mill-Faċilità, komplejt nilgħab il-futbol u għall-bidu xorta waħda kien baqa’ avversarju fil-grawnd tal-futbol, għaliex kien jilgħab ma’ klabbs differenti, iżda din is-sena ġie magħna, mal-IMSIDA FC u minn kompetituri ta’ dejjem spiċċajna nilagħbu flimkien.”

George spjegalna, li ma’ Andrew ma kienx baqa’ biss ħabib waqt partita futbol iżda anke off-pitch u f’ambjent inqas formali.   “Ir-relazzjoni bejnietna dejjem baqgħet waħda amikevoli.”

Storja li tkisser l-idea li l-gwardjan ikun bħal donnu għadu għar-residenti tal-Faċilità Korrettiva ta’ Kordin. Fil-fatt lil George staqsejnieh x’jaħseb dwar din il-perċezzjoni.

“Assolutament mhux il-każ. Ir-relazzjoni hija waħda ta’ rispett reċiproku bħal f’kull grupp ieħor ta’ individwi fis-soċjetà. Sakemm resident jirrispetta lill-gwardjani, il-gwardjani se jirrispettawh lura. Però wieħed irid jiftakar ukoll illi l-gwardjani għandhom id-dmirijiet u responsabbiltajiet tagħhom, u xogħolhom hu li jaraw illi r-regoli qed jinżammu. Gwardjan m’għandux jitqies bħala ‘għadu’ ta’ min qed jiskonta sentenza sempliċiment għaliex jagħmel xogħlu. Fl-aħħar mill-aħħar, huwa fl-interess u għall-ġid tar-residenti stess illi l-uffiċjal jagħmel xogħlu, sabiex min ikun qed jiskonta sentenza igawdiminn ambjent illi jgħinu jagħraf jirriabilità ruħu, u mhux ambjent illi jkompli jkissru.”

Min-naħa tiegħu Andrew stqarr li fil-Faċilità Korrettiva l-ħajjama tkunx waħda faċli u dejjem trid issib min jgħinek. Żied jgħidilna wkoll li dejjem irid ikollok xi ħaġa li lilek  tagħtik sodisfazzjon u fil-każ tiegħu, kienet dik il–partita futbol bejn il-gwardjani u r-residenti li kienet iżommu ’l bogħod minn tentazzjonijiet ħżiena.

George kien pront jgħidilna li kien ta’ pjaċir kbir għalih meta b’kumbinazzjoni spiċċa fl-istess tim tal-futbol bħal Andrew. Stqarr magħna s-sodisfazzjon li llum lil Andrew jista’ jsejjaħlu teammate.

“It-tnejn ingħaqadna ma’ Msida St Joseph FC b’kumbinazzjoni, iżda huwa pjaċir kbir tiegħi li nista’ nikkunsidra lil Andrew bħala teammate.”

Storja li bla dubju tgħaddi l-messaġġ li minkejja li l-gwardjani u r-residenti jkunu bejn il-ħitan tal-ħabs għal raġunijiet differenti, ir-relazzjoni ta’ bejniethom mhux biss isservi ta’ id ta’ għajnuna fi żmien diffiċli għar-residenti iżda tgħallem ukoll valuri importanti lill-gwardjani.

Illum Andrew għandu ħajja ġdida u George jara fih frott ħidmietu u frott il-ħidma li ssir ta’ kuljum fil-Faċilità. Andrew spjegalna xi tfisser ħajtu għalih illum.

“Illum il-ġurnata dak li għaddejt minnu għamilni r-raġel li jien illum, u dak li sirt huwa rifless fit-tifla tiegħi li llum il-ġurnata għandi. Is-sapport huwa importanti ħafna u grazzi għalih li ninsab hawn, nirringrazzja wkoll lit-tfajla li dejjem tgħinni nkompli nimxi ’l quddiem.”

George u Andrew it-tnejn kellhom messaġġ għal dawk il-persuni li jiġġudikaw lir-residenti tal-Faċilità. Andrew spjegalna l-weġgħa tiegħu meta fi żmien diffiċli dawk imsejħa ħbieb jagħtuk daharhom iżda meta jarawk terġa’ tiġi fuq saqajk pront jiġu jduru miegħek.

George uża l-eżempju ta’ Andrew biex jgħaddi messaġġ importanti.

“Jien nista’ ngħid li forsi naf lil Andrew fl-aktar mumenti dgħajfa ta’ ħajtu. Illum huwa ġuvni riformat b’karattru u prinċipji sodi. Andrew huwa eżempju ċar tal-fatt illi persuna tista’ tagħraf l-iżbalji tagħha u tinbidel mil-lejl għan-nhar. Persuna m’għandhiex tiġi ġġudikata għall-iżbalji tagħha; għandha tiġi mifhuma u mogħtija l-għodda kollha u l-għajnuna li għandha bżonn sabiex tirriforma ruħha.

Andrew temm b’messaġġ għal dawk li bħalu skontaw sentenzajew li għadhom fil-Faċilità.

“Dejjem hemm xaqq ta’ dawl fid-dlam. Trid tiffoka fuq l-iċken xaqq biex imbagħad dak iwasslek għal futur isbaħ. Dejjem kunukuntenti b’min intom u afdaw f’Alla.”