Wiki Loves Monuments, l-ikbar konkors fotografiku fid-dinja skont il-Guinness World Records, ser jerġa’ jsir f’Malta għat-tieni darba matul Settembru. Dan il-konkors iġib flimkien dilettanti tal-fotografija minn madwar id-dinja sabiex jieħdu ritratti mill-isbaħ tal-wirt kulturali dinji biex jitqiegħdu fuq il-Wikipedia.
Waqt konferenza stampa, il-Ministru għall-Ġustizzja, Kultura u Gvern Lokali Owen Bonnici tenna li dan se jservi sabiex inqajmu aktar kuxjenza dwar wirt kulturali fil-komunitajiet li, minkejja li mhumiex daqshekk popolari, xorta waħda għandhom il-karraterristiċi sbieħ tagħhom li l-fotografu jirnexxielu jiġbor f’ritratt.
Min-naħa tiegħu, l-President tal-Wikimedia Community Malta Tony Micallef spjega li din is-sena l-konkors qed ikun organizzat f’iżjed minn 50 pajjiż f’sitt kontinenti. Mill-bidu tal-konkors fl-2010, ħadu sehem ftit inqas minn 2 miljun ritratt, u s-sena l-oħra l-konkors ra ’l fuq minn 277,000 sottomissjoni minn 42 pajjiż. Din se tkun it-tieni darba li Malta qed tipparteċipa f’dan il-konkors fotografiku.
Iċ-Chairman ta’ Spazju Kreattiv Rupert Cefai sostna li, “Huwa fl-interess tagħna li nservu bħala pjattaforma għal proġetti u inizjattivi bħal dawn. Bħala proġett integrali fil-programm ta’ Spazju Kreattiv, Wiki Loves Monuments jgħin lil Spazju Kreattiv jilħaq il-komunità kreattiva, fosthom il-fotografi li jieħdu sehem f’dan il-konkors, iżda wkoll jilħaq komunitajiet oħra sabiex insostnu r-relazzjoni bejnhom u bejn il-wirt tal-lokalitajiet fejn jinstabu.”
Il-konkors ser jsir mill-1 ta’ Settembru sat-30 ta’ Settembru. Wara, ġurija magħmula minn esperti fil-wirt kulturali, fil-fotografija, u fil-Wikipedia se jkunu qed jagħżlu numru ta’ ritratti rebbieħa. Ir-ritratti f’dan il-konkors se jkunu wkoll qed jiġu eżibiti ġewwa Spazju Kreattiv (fil-Kavallier ta’ San Ġakbu) matul ix-xhur ta’ Novembru u Diċembru. Għaxar ritratti ser jiġu nnominati għall-konkors internazzjonali tal-Wiki Loves Monuments, fejn ikollhom l-opportunità jikkompetu ma’ ritratti oħra minn madwar id-dinja u jirbħu aktar premijiet.
Aktar informazzjoni tista’ tinkiseb mis-sit www.wikimalta.org/WLM2017. Wiki Loves Monuments Malta hija organizzata minn Wikimedia Community Malta, b’kollaborazzjoni ma’ Spazju Kreattiv u Heritage Malta, u b’ħajr lill-Photocity.
