• Għad hemm min ma tilifx it-tama li jżomm lil Busuttil
• Il-kontestanti riedu jibagħtu messaġġ li l-elezzjoni se ssir
Il-laqgħa tal-erba’ kontestanti fi Triq ir-Repubblika l-Ġimgħa filgħaxija kienet maħsuba wkoll biex tibgħat messaġġ lil parti mill-establishment f’Tal-Pietà li l-elezzjoni għal kap bdiet u m’għandu jkun hemm xejn li jxekkilha. Dan b’risposta għall-fatt li grupp ta’ nies għadhom għaddejjin b’manuvri bil-għan li ma jkun hemm ħadd, mill-erba’ kontestanti li tefgħu isimhom, li jikseb appoġġ biżżejjed biex isir kap. Dan bit-tama li terġa’ tinfetaħ tieqa għal Simon Busuttil.
Irrapportajna dan fl-aħħar ġimgħat u storja ppubblikata fit-Times of Malta fl-aħħar jiem dwar vot ta’ protesta li jista’ jkun hemm minn kunsillieri u tesserati Nazzjonalisti kienet interperata bħala konferma oħra li dan il-pjan jeżisti.
Għax filwaqt li parti mill-establishment intefgħet b’ruħha u ġisimha wara Adrian Delia, parti oħra qed timmanuvra biex l-elezzjoni ma ssirx jew tidher bħala waħda li mhix leġittima. Daphne Caruana Galizia, l-elezzjoni sejħitilha ċajta u Ivan Camilleri, ġurnalist tal-PN fit-Times of Malta, qal li għandha tkun posposta. Dawn huma kollha mossi li xejn ma niżlu tajjeb ma’ Chris Said u l-kontestanti l-oħra li jafu li anke jekk Simon Busuttil qed jgħid kontinwament li se jwarrab hu ma tantx jixtieq jagħmel dan.
Tant li fl-aħħar jiem organizza konferenza tal-aħbarijiet oħra u fiha ddikjara b’mod ċar li mhux beħsiebu jċedi s-siġġu Parlamentari tiegħu. Għalkemm l-idea ta’ vot ta’ protesta tista’ tidher remota, il-kontestanti jafu li hemm ċirkostanza, li jekk jispiċċa wieħed waħdu, jintalab vot ta’ appoġġ ta’ iktar minn 65% u hija din it-tieqa li jridu jżommu miftuħa ta’ madwar Busuttil.
Saħansitra meta mitlub jibgħat ir-regoli tal-elezzjoni minn ONE NEWS fl-aħħar sigħat, kelliem tal-Partit Nazzjonalista naqas li jagħmel dan. B’hekk il-kontestanti għandhom l-ewwel sfida li jikkonvinċu lin-Nazzjonalisti li huma għażla tajba biżżejjed biex imorru jivvotawlhom. U dan iridu jagħmluh filwaqt li dawk ta’ madwar Simon Busuttil ikomplu bil-kampanja dwar kemm il-Kap baqagħlu x’joffri lill-Partit Nazzjonalsita. Tant li artiklu tal-Kap tal-Kommunikazzjoni tal-Gvern dwar it-tmiem ta’ Busuttil ġab ir-reazzjoni immedjata ta’ Ann Fenech, waħda mill-iktar qrib ta’ Simon Busuttil.
Il-President tal-Eżekuttiv Nazzjonalista, Ann Fenech, irreaġixxiet bl-aħrax għall-artiklu u f’ “Talking Point” fit-Times of Malta, l-għada li Kurt Farrugia kiteb kif ħadd mhu se jibki t-telfa ta’ Simon Busuttil, Ann Fenech kitbet li l-korruzzjoni għandha kelliem u bdiet il-litanija li l-Partit Nazzjonalista kellu qabel l-elezzjoni ġenerali.Għax Farrugia kkritika l-operat ta’ Simon Busuttil, Ann Fenech kitbet li qed “jitkellem daqslikieku l-poplu Malti xi speċi injoranta.”
Imbagħad minn hemm erħitilha tfaħħar lill-Kap tagħha, li fl-aħħar elezzjoni ġenerali wassal lill-Partit Nazzjonalista għal telfa enormi.
