Kienet is-somma ta’ €186,361 bħala dik finali li nġabret waqt l-Maratona Oħloq Tbissima. Maratona li damet madwar 60 siegħa li ntemmet b’varjetà finali li wasslet għall-għeluq tal-ħmistax-il edizzjoni tal-Maratona Oħloq Tbissima.
Atmosfera ħelwa mliet il-bitħa tad-Dar ta’ San Ġużepp f’Santa Venera. Atturi, kantanti, żeffiena, preżentaturi u diversi oħrajn taw is-sehem tagħhom sabiex l-attivita’ ma taqtax u l-pubbliku jgawdi d-divertiment li qed jiġi mħejji.
Din hija Maratona Missjunarja li tfittex li tiġbor fondi b’risq il-Missjonijiet fdati f’idejn is-Soċjetà Missjunarji ta’ San Pawl, ħalli jitkomplew id-diversi proġetti li qed isiru sabiex itejbu l-kwalita’ ta’ ħajja ta’ dawn in-nies, u anke sabiex ikunu jistgħu jinbdew proġetti oħrajn dejjem biex id-diversi familji jgħixu b’aktar dinjità.
