Numru ta’ kontenituri tal-EcoPure li jintużaw għad-dispensers se jkunu qed jinġabru. Dan wara li nstab li minħabba problema teknika li kien hemm fl-impjant, ġie affetwat l-ilma li hemm f’uħud mill-kontenituri.
Il-kumpanija Farsons sostniet li se tkun qed tiġbor lura l-kontenituri li huma tal-18.9 litri u kif ukoll tal-10 litri li jagħmlu parti mill-istock li jitla’ sa numru 188.
Il-kumpanija sostniet li għalkemm jekk wieħed jixrob dan l-ilma mhux se jkun qed ipoġġi lilu nnifsu f’xi tip ta’ riskju, din il-ġabra se tkun qed issir bħala miżura ta’ prekwazjoni.
Wieħed jista’ jiċċekkja jekk għandux wieħed minn dawn il-kontenituri billi jħares lejn it-tapp tal-kontenitur, fejn fuq it-tapp hemm l-informazzjoni neċessarja.
Il-klijenti li jixtiequ jakkwistaw iktar informazzjoni dwar il-ġabra ta’ dan il-prodott jista jċempel lill-kumpanija fuq 80074422 jew 23814411 bejn it-8:00 ta’ filgħodu u s-19:00 ta’ filgħaxija.
