Iben il-kbir tal-President Amerikan Donald Trump iltaqa’ m’avukatessa Russa, jiem wara li missieru rebaħ in-nominazzjoni Repubblikana qabel l-elezzjoni Presidenzjali.
Mal-gazzetta The New York Times, Donald Trump Junior ammetta li fi Trump Towers, fi New York, iltaqa’ ma’ Natalia Veselnitskaya biex jikseb informazzjoni li setgħtet itappan ir-reputazzjoni tar-rivali Hilary Clinton.
Madankollu iben il-President tal-Istati Uniti saħaq li fil-laqgħa li kellu mar-Russa ma nqasmet l-ebda informazzjoni importanti.
Jirriżulta li f’din il-laqgħa kien hemm preżenti wkoll dak li spiċċa kien qed imexxi l-kampanja elettorali ta’ Trump.
L-FBI u l-Kungress Amerikan qed jinvestigaw jekk membri mit-tim tal-kampanja ta’ Trump kellhomx kuntatti ma’ uffiċjali tal-Kremlin bil-possibilità li l-Gvern Russu intervjena fl-elezzjoni Amerikana.
