“Ejja indendlu l-bandiera Maltija mall-gallariji tagħna. Ejja nuru li l-bajda u ħamra inbusha, bħalha m’ hemmx u ma tintemmx”.
Qal dan fost appoġġ kbir mill-mijiet tal-eluf miġbura fl-Imqabba l-Prim Ministru u mexxej Laburista Joseph Muscat.
B’referenza għal Simon Busuttil, Muscat qal: “Jekk bniedem li jaspira li gimgħatejn ohra jkun Prim Ministru jaħseb li jista’ jagħmel stqarrijiet, joħrog in-nies fit-toroq, jissogra li jwaqqaf l-ekonomija, iħammeg isem pajjiżna, jhedded li jitfa’ lil xi ħadd il-ħabs, imbagħad jaħseb li jista’ ma jerfax responsabiltà, allura qed jikkonferma li mhux denju li jmexxi lil pajjizna” qal il-mexxej Laburista Joseph Muscat.
Fl-Imqabba Muscat indirizza lil dawk il-persuni li jikkunsidraw ruħhom li m’huma tal-ebda partit. Dawk li jikkunsidraw il-partiġġjaniżmu żejjed bħala disgustanti. Indirizzahom fil-preżenza ta’ dawk miġbura fl-Imqabba, kburin li huma Maltin.
Lil dawn in-nies qalilhom li jafu li s-suċċess ekonomiku li qed iħossu fi bwiethom, li qed iħossu l-familji tagħhom, ġej mid-deċizjonijiet li amministrazzjoni Laburista fil-Gvern kellha l-kuraġġ li tieħu flimkien. Deċiżjonijiet li ħaddiehor kellu l-okkażjoni li jieħu għal snin sħaħ iżda ma kienx kapaċi jieħu, jew ma riedx jieħu. Id-deċiżjonijiet li ttieħdu flimkien ħallew lill-poplu jaħdem u ssarrfu f’ riżultati grazzi għall-bżulija u xogħol bla waqfien tal-Maltin u Għawdxin.
Joseph Muscat qal li dawn id-deċiżjonijiet wasslu biex inbniet middle class ġdida, fejn il-familji għall-ewwel darba qed iħossu li mhux qed jaħdmu aktar u xorta qed jaqgħu lura, jew jaħdmu aktar biex jibqgħu fejn huma, iżda issa qed jirnexxielkom jimxu ‘il quddiem, qed jirnexxielkom jagħtu ħajja ahjar lil uliedhom u jgħixu biċ-ċertezza li uliedhom se jkunu aħjar minnhom.
“Nifrah narakom tifirħu għal uliedkom, għaliex uliedkom huma ulied Malta, u se nkompli naħdem biex ikollhom l-akbar suċċess u l-aqwa żmien ta’ ħajjithom” qal Joseph Muscat.
Kompla jgħid li l-koalizzjoni ta’ konfużjoni magħmula minn Simon Busuttil u Marlene Farrugia iġġib riskji u inċertezza kbira. Tkisser dak kollu li l-pajjiż kiseb flimkien bil-bżulija.
L-għażla hi bejn Prim Ministru dgħajjef, ostaġġ ta’ koalizzjoni b’siġġu wieħed maġġoranza, fejn kuljum ikollu jinnegozja biex ma jaqax il-gvern, u gvern sod, bi tmexxija ċara, proposti realistiċi, u li jiggarantixxi stabilita’ li ġġib atar xogħol u ġid.
Simon Busuttil, spjega Joseph Muscat, għamel din il-koalizzjoni ta’ konfużjoni għaliex qata qalbu diġa’ waħdu, u poġġa lil partit tiegħu u kwalunkwe ċans ta’ gvern, u l-istabilita’ tal-pajjiż ostaġġ tal-burdati ta’ persuna waħda u l-burdati tagħha.
“Dan huwa riskju serju għal kull familja u negozju”.
Ħaddieħor ma ddejjaq xejn jagħmel ħsara lill-pajjiż, irewwah kontra pajjiżna barra minn Malta, jgħin u jaħdem ma’ min irid jisraqilna x-xogħol, iweġġa’ lin-nies biex mingħalih iweġġa lill-Prim Minsitru, jara sall-ponta ta’ imnieħru għaliex iddisprat politikament u kiser il-kelma li kull Maltija u Malti jistennew minn xulxin, li jkollna kemm ikollna kwistjonijiet bejnietna, qatt ma ngħidu kontra pajjiżna, qatt ma naħdmu kontra pajjiżna, izda dejjem inkunu magħqudin flimkien favur Malta.
Simon Busuttil din il-kelma ramiha mit-tieqa u l-Maltin u Għawdxin kburin b’ pajjiżhom se jiġġudikawh fuq hekk.
Amministrazzjoni Laburista tibni u ġġib kull biċċa xogħol li tista’ lejn Malta. Busuttil jkisser u jipprova jgerrex mall-barranin, ma’ kull qans li jkollu.
In-nies se jiġġudikawh fuq il-fatt li eskala s-sitwazzjoni għal livelli bla preċedent bi stqarrijiet, billi ftiehem mall-barranin li jridu jisirqulna xogħlna, billi niżżel in-nies fit-toroq fuq gidba, fuq kalunja li saret kontra l-Prim Ministru, kontra, martu, kontra familtu, iżda fuq kollox, kontra l-pajjiż.
“U la l-kalunja saret kontra pajjiżna, issa hija kalunja kontrikom ukoll, kontra kull Maltija u Malti” qal Muscat.
Kif qed jagħmel kuljum, illum Joseph Muscat reġa’ sfida lil Simon Busuttil. Jekk l-inkjesta indipendenti, li hu qed imur quddiemha, u allura għandu fiducja fiha, avolja qed jipprova jagħmel minn kollox biex itawwalha, issib xi ħjiel li dak li ntqal fil-konfront tiegħu, ta’ martu u ta’ familtu huwa b’ xi mod veru, Joseph Muscat jirriżenja minnufih.
Jgħid dan bl-aktar mod ċar għaliex jaf li qed jgħid il-verita’. Izda jekk jinstab li dak li rikeb fuqu hu u li għen fl-ippjanar tiegħu hu huwa gidba u kalunja, se jkollu jirriżenja Busuttil.
Toħrog meta toħrog l-inkjesta, ikun x’ ikun, ikun fejn ikun, se jkollu jġorr kull tip ta’ responsabilta’ talli ħadem mall-barranin fuq din il-kalunja kontra pajjiżna, ta’ din il-kalunja kontija, ta’ din il-kalunja kontra l-poplu Malti.
“Qatt ma għaddieli minn mohhi li naħdem kontra pajjiżi għax ma naqbilx mall-gvern. Qatt ma hassejt li għandi nistmerr lil pajjiżi kif Simon Busuttil ilu jagħmel għaliex sempliċiment irid il-poter. Għalhekk, l-appell tiegħi huwa għalikom kollha li tħobbu lil pajjiżna. Ejja nagħtu sinjal ieħor li s-saħħa ta’ Malta hija ferm akbar milli jaħsbu ħafna, li ma aħna se nippermettu lil ħadd jogħrok idejh billi jaħdem mall-barranin biex jagħmlilna l-hsara, li Malta hija Tagħna Lkoll u li Malta tiġi l-Ewwel u Qabel Kollox. Din hija sejħa patrijottika ta’ imħabba lejn pajjiżna, għaliex min ma jħobbx lil pajjiżna ma jistax imexxi lil pajjizna” temm jgħid il-Mexxej Laburista.
