Kollox jindika li Destiny Chukunyere għamlitha għal Britain’s Got Talent.
Fl-aħħar jiem il-kantanta b’vuċi stupenda kienet f’Londra u informazzjoni li għandu f’idejh one.com.mt turi li Destiny se tkun qed tidher fil-programm Britain’s Got Talent li se jixxandar illejla fl-Ingilterra fuq ITV.
Ta’ 14-il sena, Destiny kisbet il-fama għall-kapaċitajiet kbar li għandha, tant li fir-riklam li qed idur għall-programm li jmiss intweriet silta qasira minn dak li mistennija tippreżenta Destiny quddiem il-ġurija ta’ Britain’s Got Talent.
Destiny Chukunyere rebħet il-Junior Eurovision Song Contest fl-2015 bil-kanzunetta Not My Soul u minn dakinhar qatt ma ħarset lura biex kompliet tikseb aktar suċċessi fil-karriera tagħha li mistennija tiżviluppa sew permezz tal-esperjenza tagħha fi Britain’s Got Talent.
Filwaqt li nawgurawlha, nistennew bil-ħerqa x’ħa jkun il-ġudizzju tal-ġurija magħmula fost l-oħrajn mill-personalita’ kontroversjali, Simon Cowell.
