Il-manifest elettorali tal-Partit Laburista għall-elezzjoni ġenerali li ġejja huwa bbażat fuq erba’ prinċipji; il-mobbilta soċjali, il-ġustizzja soċjali, l-ugwaljanza u l-għaqda. Qal dan il-Prim Ministru, Joseph Muscat, fi tmiem il-Kungress Ġenerali tal-Partit Laburista fejn tenna li l-manifest elettorali tal-Partit Laburista għall-elezzjoni ġenerali se jkun ambizzjuż u superjuri. Bil-prijoritajiet lesti l-Kungress Ġenerali serva biex jinkisbu iktar ideat li issa se jkunu kkunsidrati għal manifest elettorali. Meta tkellemd war il-mobbiltà soċjali l-Prim Ministru qal li din il-ġenerazzjoni għandu jkollha dritt tkun aħjar minn ta’ qabilha u tenna li l-mobbiltà soċjali ma tistax tkun possibbli bil-politika tal-għira.
“Il-ġid iġib il-ġid. Dan hu ċ-ċirku li bdejna nidraw fl-erba snin li għaddew,” qal il-Prim Ministru li tenna li jibbilanċja ma’ dan kollu hemm il-ġustizzja soċjali.
“Dan kien gvern li wera lill-Ewropej li mhux veru dak li jingħad li jew tkun kompetenti ekonomikament jew tkun responsabbli soċjalment. Urejna li fl-istess ħin tista’ tkabbar l-ekonomija u turi li taf x’qed tgħamel fil-finanzi filwaqt li tkun ġust u tara li jkun hawn progress soċjali,” qal il-Prim Ministru li tenna li l-moviment irid joħloq il-ġid biex iqassmu. “Lanqas aħna moviment populitstà li nonfqu dak li m’għandniex,” qal il-Prim Minsitru li tenna li l-moviment irid jgħid lil min hu vulnerabbli.
“Is-servizzi tas-saħħa rriduhom fejn ma tkunx ikkurat skont kemm għandek flus il-bank. Din mhux kull pajjiż jista’ jiftaħar biha,” qal Joseph Muscat li tenna kif dan hu marbut ukoll mal-prinċipju tal-ugwaljanza.
Fil-qasam tal-ugwaljanza, qal il-Prim Ministru, l-edukazzjoni hi l-aqwa għodda għall-mobbiltà soċjali, il-ġustizzja soċjali u l-ugwaljanza. Sostna li l-pajjiż ma jrid jitlef l-opportunità ta’ ħadd. “L-ugwaljanza tfisser li nneħħu kull traċċa ta’ diskriminazzjoni bejn l-ulied ta’ dan il-pajjiż,” qal il-Prim Ministru. Żied li jemmen li fil-manifest għandu jkun hemm sforz bla preċedent biex titħassar kull forma ta’ diskriminazzjoni diretta jew indiretta. “Irridu nneħħu kull referenza bejn irġiel u nisa b’mod li tiddiskrimina kontra n-nisa,” qal Joseph Muscat li jrid li fil-leġiżlatura li jmiss irid diskussjoni dwar kwoti ta’ nisa parlamentari.
Qal li għalkemm saru avvanzi kbar irridu nimxu iktar ‘il quddiem. “Fi ftit tal-ġimgħat irridu mmexxu liġi li l-unjoni ċivili ssir ugwali maż-żwieġ. Biex l-uniku bidla li jonqos issir, dik tal-isem, issir ukoll,” qal Joseph Muscat. Muscat irid li fil-leġiżlatura li jmiss il-pajjiż jagħmel qabża liberali ‘l quddiem. “Dan il-pajjiż jrid jagħżel b’mod ċar jekk imurx lura taħt il-koalizzjoni tal-konfużjoni jew jagħmilx qabża ‘l quddiem taħt dan il-moviment,” qal Joseph Muscat li tenna li l-moviment li jmexxi hu mhux kuntent li jibqa’ fejn hu. “L-ikbar appell li għandi huwa għaż-żgħażagħ.
Ma waqaftx noħlom, nitlobkom ma tieqfux toħolmu intom. Għandi ħolma Maltija. Dan il-pajjiż jista’ jkun l-aqwa pajjiż fejn wieħed jista’ jaspira li jgħix,” qal Joseph Muscat li tenna li dan kollu jrid isir realtża f’sens ta’ għaqda nazzjonali. “Għaqda nazzjonali li hemm min irid itellifna,” qal Joseph Muscat.
“Se nkomplu ninsistu fuq l-għaqda,” qal Joseph Muscat li temm b’appell biex ngħarfu dak li jgħaqqadna mhux dak li jifridna.
https://www.facebook.com/ONENEWSMALTA/videos/1476932572358494/
