F’pass ieħor importanti lejn futur aktar nadif u sostenibbli, il-Gvern nieda mill-ġdid skema nazzjonali biex jinkoraġġixxi l-użu ta’ sorsi rinnovabbli tal-enerġija, b’enfasi fuq proġetti fuq skala kummerċjali u industrijali.
L-iskema l-ġdida, permezz ta’ sejħa għall-offerti, se toffri kapaċità ta’ aktar minn 40 megawatt għal impjanti ta’ enerġija rinnovabbli, b’kuntratti ta’ 20 sena u ħlas premium għal kull kWh.
Dan isegwi sena rekord fejn ġew iffirmati kuntratti għal 30 megawatt ta’ sistemi fotovoltajċi, li se jiġu installati fi żmien qrib.
Għall-ewwel darba, il-Gvern se jippermetti li offerti b’kapaċità ta’ bejn 40 u 200kW jistgħu jinkludu diversi installazzjonijiet iżgħar f’offerta waħda.
Dan il-mekkaniżmu se jippermetti sistemi solari fuq soqfa differenti, li qabel kienu esklużi, biex jikkwalifikaw taħt l-istess sejħa.
Din is-sena ġew reveduti wkoll ir-regolamenti biex bdiewa rreġistrati jkunu jistgħu jinstallaw pannelli fuq is-serer tagħhom, filwaqt li jitħares il-prodott agrikolu.
L-iskema hi maqsuma fi tliet kategoriji: Kategorija 1 għal bejn 40kW u 200kW; Kategorija 2 għal bejn 200kW u megawatt wieħed; u Kategorija 3 għal proġetti ta’ ’l fuq minn megawatt wieħed.
Proġetti inqas minn megawatt wieħed għandhom żmien sentejn biex jitlestew, filwaqt li dawk akbar se jkollhom tliet snin biex jitwettqu, mingħajr telf finanzjarju matul dan il-perjodu.
L-Inġinier Marjohn Abela, Kap Eżekuttiv tar-Regolatur għall-Enerġija u l-Ilma, ir-REWS, qal li l-iskema tiżgura li Malta tibqa’ fuq quddiem nett fil-qasam tal-enerġija nadifa.
Min-naħa tagħha, il-Ministru responsabbli, Miriam Dalli, iddeskriviet din l-iskema bħala investiment dirett fis-sigurtà enerġetika u fl-ambjent ta’ pajjiżna.
“Illum il-ġurnata għandna 252 megawatts ta’ enerġija rinnovabbli … qed nilħqu l-15% meta konna qed naħsbu li, sal-2030, ikollna qisu 11.5%. U dan il-persentaġġ irridu nżiduh bi skemi ta’ dan it-tip.”
MIRIAM DALLI
