Il-klabb tal-waterpolo minn Marsalforn, l-Otters Aquatic Sports Club, esprimew l-apprezzament tagħhom lill-Ministeru għal Għawdex u l-Ippjanar għall-bini tal-pixxina l-ġdida tal-ogħla livell fil-gżira.
F’messaġġ fuq il-midja soċjali, il-klabb tenna li din il-faċilità ta’ daqs Olimpiku hi verament tal-ogħla standard u tirrappreżenta mira kbira milħuqa fl-isport akkwatiku f’pajjiżna.
Semmew kif, fil-preżent, il-klabb, li twaqqaf fl-1971, ġie mistieden mill-Ministeru biex jgħin fil-provi operattivi tal-kumpless, anke wara li kienu involuti b’mod attiv fil-pjani biex jinbena dan il-kumpless sportiv.
Hu għalhekk li dawn il-provi operazzjonali huma essenzjali biex jiġi żgurat li s-sistemi kollha jkunu qed jiffunzjonaw b’ mod korrett qabel il-kumpless jinfetaħ għall-pubbliku u l-isportivi kollha li se jkunu qed jużawh.
L-Otters qalu li, fost l-aspetti li raw jiġu inklużi, kienu l-osservanza tas-saħħa u s-sigurtà, l-aċċessibbiltà, iċ-ċirkolazzjoni u l-fluss tan-nies, flimkien ma’ elementi operattivi ewlenin oħrajn, bħal protokolli ta’ emerġenza, sistemi ta’ ġestjoni tal-faċilitajiet u loġistika tal-esperjenza tal-utenti.
