Bħal kull sena, titfakkar dik li tatna l-ħajja u rabbietna bl-aħjar mod possibbli. Dik li, għall-ebda ċirkostanzi, ma tħallina xi darba nfendu għal rasna – il-pilastru, li tiggwidana tul ħajjitna fit-triq it-tajba. Dik li tissejjaħ omm.
Il-persuna tal-omm mhix biss dik naturali, imma hi wkoll dik li twennes l-ulied, li ma welldithomx hi, iżda xorta tindokrahom b’imħabba u għożża.
Omm hi dik li tilfet lil uliedha, dik li ma rnexxilhiex twassal sat-tqala sal-aħħar, dik li xtaqet li tkun omm, imma għal xi raġuni jew oħra, ma rnexxilhiex u li ma tistax tħaddan jew tgħannaq lil uliedha. Omm hi dik il-foster carer li adottat jew is-soru fid-djar tat-tfal.
Fl-okkażjoni ta’ Jum l-Omm, ONE News iltaqa’ ma’ omm imġarrba, Carmen Camilleri, li minbarra żewgt ibniet, għandha wkoll ġuvni ta’ 39 sena.
Irrakkontat magħna s-sagrifiċċji li għamlet għal uliedha, kemm issagrifikat ħajjitha u ħinha għall-ġid tagħhom. Qaltilna li fejn jidħlu huma ma ċċedix pulzier.
Minkejja dan, Carmen qaltilna li daqet l-imrar tal-ħajja, minħabba l-vizzju li waqa’ fih binha, tant li, f’xi waqtiet, kienet tħossha li d-dinja se taqa’ fuqha.
Qalet, “L-aktar inkwiet tiegħi li ma kienx jaċċetta li kellu problema u, meta konna niġbdulu l-attenzjoni fuq ix-xorb, kien jgħidli … u iva issa nnaqqsu. U jiena dejjem kont ngħidlu għandna nfittxu xi tip ta’ għajnuna professjonali.”
Carmen kienet tilfet il-fiduċja li xi darba binha qatt joħroġ mill-problema. Saħansitra, meta kienet tarah f’dik is-sura, kien tħoss li dak mhux binha li tant rabbiet b’għożża.
Qalet, “Bħala omm batejt ħafna, għax bħalma għedtlek kont narah qed jinqered. Il-biċċa hi li aħna qed naraw x’qed jagħmel u kien jagħmel sitwazzjonijiet ta’ barra minn hawn. X’ħin kien ikun taħt l-effett, kien ikun veru gravi. Kien ikun aggressiv. Is-sigurtà tagħna xejn ma kienet tajba, imma hu ma kienx qed jaraha. Hu kien jgħidilna li qegħda f’moħħkom, intom qed tgħaġġbuha. Hu x’ħin jixrob ikun taħt l-effett, jagħmillek xi ħin rieqed u x’ħin iqum kien jinsa kollox.”
Carmen kellha għadd ta’ biżgħat, fosthom li x-xorb kien qed jagħmillu ħafna ħsara għal saħħtu. L-alkoħol kien qed jaffettwa lill-familja kollha.
Qalet, “Dawk il-ħinijiet li jkun taħt l-effett, ġieli waqa’ minn fuq is-sodda, kont il-ħin kollu mmur niċċekkja jekk hux qed jieħu nifs, kien ikun aggressiv, iħabbat rasu mal-ħajt, ħafna għajjat, ħafna storbju, ħafna ġlied.”
Ħajjet Carmen tul dawn is-snin ma kinitx ward u żahar, imma qatt ma qatgħet qalbha, minkejja l-isfidi u d-diffikultajiet li sabet ruħha fihom bla mistenni.
Spjegat kif, “It-tifel ma kienx joħroġ jixrob barra, kien jixrob ġewwa fil-kamra tiegħu, jingħalaq hemm, xorb jaħbih kullimkien, taħt is-saqqu fil-gwardarobba, aħna domna nsibu xorb moħbi żmien twil.”
Dulur ewlieni għal din l-omm kien li binha kien jemmen li l-flixkun u x-xorb kienu ħajtu.
Qalet, “L-unika relazzjoni li kellu mal-flixkun. La kien jagħti kasna, la nistgħu nitkellmu miegħu, la jagħti kas lil ħutu, xejn ma kien, imbagħad, iddeċieda waħdu li jibda l-programm.”
It-triq kienet għat-telgħa, ħajjet binha u tal-familja tagħha kienu fid-dlam. Għaldaqstant, fittxew l-għajnuna professjonali.
Qalet, “Wasal iż-żmien li nieħduil-family therapy, ilkoll flimkien, il-familja kollha, biex nerġgħu nibnu l-familja mill-ġdid. Konna tlifnih totalment,” u kif “Bħala omm iebsa. Il-fatt li kellna nieħdu deċizjoni, we had to be cruel to be kind, kellna nieħdu d-deċizjoni li ma jibqax id-dar, għax safety għalina ma kienet xejn. Kien ikun ħafna aggressiv. Dik weġġajt ħafna biex ħadtha.”
Wara 14-il sena, lil binha llum tista’ tgawdih lura, wara li ħareġ mill-problema tax-xorb, fi programm ta’ sena u xahrejn, grazzi għas-servizzi offruti mill-Aġenzija Sedqa fi ħdan l-FSWS.
Carmen kellha messaġġ għal dawk l-ommijiet, bħalha, li forsi bħalissa għaddejjin minn xi kalvarju tal-ħajja minħabba wliedhom.
Qalet, “Ifittxu l-għajnuna. Għaddejna u batejna. Forsi għad jiġi żmien ukoll ħalli, jekk il-Bambin irid, forsi huma wkoll ikollhom, li llum ħriġna with flying colours, s’issa, għax s’issa nista’ ngħid. Taqtgħux qalbkom.”
