Dalgħodu tħabbret il-mewt ta’ Joseph Carabott ta’ 67 sena, li huwa sid il-ħanut tad-deheb fiż-Żurrieq li kien imsawwat waqt hold-up fl-2023.
Il-każ imur lura għall-Ġimgħa, 25 ta’ Awwissu 2023 meta l-ħajja ta’ Carabott inqelbet ta’ taħt fuq, hekk kif tliet ħallelin daħlu fil-ħanut tiegħu, rabtuh, serquh u aggredewh.
Fuq il-post marru l-Pulizija fejn sabu lil Joseph Carabott imsakkar fil-ħanut tiegħu stess, u aktar tard kien ġie ċċertifikat fil-periklu tal-mewt minħabba ġrieħi estensivi li sofra f’rasu kawża tax-xebgħa li kien qala’.
Propju jumejn wara, il-Ħadd, il-Pulizija marret biex tarresta lit-tliet imputati minn dar f’Tas-Sliema fejn dawn ippruvaw jaħarbu, iżda nqabdu mill-Pulizija.
B’rabta ma’ dan il-kas il-Qorti kienu tressqu Donna Borg Scibberas ta’ 29 sena, u żewġt irġiel Marokkini ta’ 26 u 37 sena. Huma wieġbu mhux ħatja għall-akkużi miġjuba kontrihom u baqgħu jinżammu arrestati.
F’Jannar li għadda, Sciberras ammettiet għall-akkużi u kienet ikkundannata 28 sena ħabs waqt li l-każ fil-konfront taż-żewġ Marokkini għadu ma nqatax.
Minbarra hekk, Sciberras ġiet ordnata tħallas ftit inqas minn tnax-il elf ewro fi spejjeż tal-Qorti, €8,000 f’kumpens lill-vittma għall-ġrieħi li kkaġunatlu u ordni ta’ protezzjoni favur Joseph Carabott ukoll.
Wara li tħabbret il-mewt ta’ Joseph Carabott, bosta qraba sellmu l-memorja tiegħu fuq il-midja soċjali. Fosthom kien hemm in-neputijiet li tennew li wara sena u nofs ta’ agunija, fl-aħħar sab il-mistrieħ.
Huma ppublikaw serje ta’ ritratti, deskritti bħala l-aqwa memorji li għandhom maz-ziju tagħhom u sostnew li se jibqgħu jiftakruh bħala raġel dejjem daħkan.
