F’wirja mill-aqwa speċjalment fl-ewwel taqsima, it-tim nazzjonali ta’ Malta kien diġá aċċerta mit-tliet punti sa tmiem l-ewwel taqsima, hekk kif kien diġá bena vantaġġ ta’ tliet goals. Dan meta għeleb lil Georgia bl-iskor strett ta’ 3-2. B’hekk wara r-rebħa minima ta’ 1-0 ġewwa darna kontra Andorra, din kienet it-tieni rebħa konsekuttiva tiegħu fi Grupp C2, biex issa għandu sitt punti minn tliet partiti.
Għall-Maltin irritornat fl-iskwadra minn injury Ann Marie Said iżda ma ġietx utilizzata mill-coach Manuela Tesse, iżda kellhom lil Charlene Zammit sospiża fejn mistennija tirritorna it-Tlieta li ġej kontra l-istess Georgia din id-darba ġewwa darna. Malta kellha tgħaddi wkoll mingħajr is-servizzi tal-player ta’ Mgarr United, Brenda Borg, li għadha qed tirkupra minn injury.
Il-Maltin kienu indubbjament l-aħjar tim fl-ewwel taqsima, iżda fit-tieni taqsima rrilassaw xi ftit iżżejjed fejn anke sofrew żewġ goals, b’Georgia li saħansitra setgħu jerġgħu isibu x-xibka wara żbalji fid-difiża Maltija.
Malta terġa’ taffronta lil Georgia nhar it-Tlieta li ġej ġewwa darna fis-Centenary Stadium fis-7pm.
Kienu l-Maltin li ħolqu l-ewwel periklu fil-21 minuta meta Haley Bugeja għaddiet tajjeb lejn Maria Farrugia, iżda pront kienet il-goalkepeer ta’ Georgia Tatia Gabunia li ħarġet barra minn postha u interċettat kull periklu.
Huma komplew jiddettaw il-logħob u ħames minuti wara fetħu l-iskor meta Haley Bugeja indirizzat cross preċiż li sab lil MARIA FARRUGIA li żmarkata u permezz ta’ daqqa ta’ ras preċiża mill-viċin tefgħet ġewwa.
Georgia wieġbu fit-28 minuta meta xutt kważi minn tarf il-kaxxa ta’ Nino Bukhnikidze intemm gholi.
Iżda kienu l-Maltin li rduppjaw l-iskor man-nofsiegħa logħob meta l-iskorer prolifiku ta’ Inter HALEY BUGEJA avvanzat tajjeb fil-kaxxa u u b’eleganza permezz ta’ xutt fil-baxx tefgħet il-ballun fir-rokna tax-xibka.
Il-Maltin komplew fuq l-offensiva u żewġ minuti biss wara, il-captain Emma Lipman kellha xutt minn pożizzjoni ideali salvat tajjeb minn Gabunia.
Kulma jmur kompla d-dominju tal-Maltin u fil-45 minuta eżattament qabel tmiem l-ewwel taqsima, għamluhom tlieta meta f’azzjoni ta’ kontrattakk veloċi, MARIA FARRUGIA, avvanzat tajjeb fil-kaxxa u tefgħet ġewwa, biex b’hekk irreġistrat doppjetta personali.
Fil-ftuħ tat-tieni taqsima, il-Maltin komplew fejn ħallew fl-ewwel waħda u fis-47 minuta l-awtriċi ta’ doppjetta fl-ewwel taqsima, Maria Farrugia, indirizzat cross-shot insidjuż fid-direzzjoni ta’ Rachel Cuschieri li iżda għal ftit ma laħqitx il-ballun li finalment intemm barra, bl-azzjoni tisfuma fix-xejn.
Huma komplew jippressaw u fil-55 minuta resqu viċin ir-raba’ goal meta f’kombinazzjoni perfetta bejn Haley Bugeja u Rachel Cuschieri, din tal-aħħar kellha x-xutt tagħha mill-viċin jaħbat mal-wieqfa qabel intemm barra, b’Georgia jeħilsuha ħafif.
Izda kienu Georgia li naqsu l-marġni tal-iskor mas-siegħa logħob meta Tatiana Matveeva approfitatt minn żball kolossali ta’ Emma Lipman fid-difiża, għaddiet tajjeb lejn il-player li tilgħab ma’ Trabzonspor fit-Turkija, TEONA BAKRADZE, li kkontrollat tajjeb il-ballun u għelbet għal kollox lill-goalkeeper Maltija, Janice Xuereb, b’dan ikun proprju l-ewwel goal tagħha fi 18-il dehra għal pajjiżha.
Il-Maltin wieġbu għaxar minuti wara u tilfu cans tad-deheb li jagħmluhom erbgħa meta l-ewwel Haley Bugeja kellha xutt sabiħ mill-viċin salvat tajjeb minn Gabunia biex mir-rebound Rachel Cuschieri minn taħt il-lasta tefgħet inkreddibilment barra.
Iżda kienu Georgia għoddhom reġgħu sabu x-xibka fit-72 minuta meta Bakradze approfittat minn żball ieħor fid-difiża ta’ Lipman, iżda kellha x-xutt tagħha mill-viċin jgħaddi jħakkek ma’ sieq il-wieqfa.
Malta reġġħet ħolqot il-periklu u kienet sfortunata li ma sabitx ix-xibka għar-raba’ darba fit-80 minuta meta Maria Farrugia għaddiet tajjeb lejn Rachel Cuschieri li kellha x-xutt dijagonali tagħha mid-distanza jistampa mal-mimduda.
Huma komplew fuq l-offensiva u fis-86 minuta, il-captain taċ-champions Swieqi United, Shona Zammit, kellha xutt mill-viċin salvat tajjeb minn Gabunia.
U mill-azzjoni li segwiet fuq in-naħa l-oħra tal-pitch, sekondi biss wara, Georgia kellhom f’saqajhom il-ballun tat-tieni goal meta s-solita Bakradze kienet lesta li titfa’ l-ballun fix-xibka iżda pronta kienet il-captain Lipman li iinterċettat tajjeb biex pattiet bis-sħiħ għaż-żewġ żbalji li wettqet iktar qabel fil-partita.
Fil-94 minuta Georgia rebħu penalty meta Nicole Sciberras waqqgħet lil Bakradze fil-kaxxa. Mill-11-il metru iinkarigat ruħha l-istess Bakradze li kellha x-xutt fil-baxx tagħha savlvat minn mal-art minn Xuereb. Madankollu, ir-refere mill-Kazakhstan Elvira Nurmustafina ordnat li l-penalty ġerġa’ jingħata, fejn din id-darba inkarigat ruħha MATIA DANELIA li ma żbaljatx, hekk kif permezz ta’ xutt b’saħħtu tefgħet il-ballun naħa u lil Xuereb in-naħa opposta.
Il-Maltin komplew jamministraw il-vantaġġ minimu li kellhom sa tmiem il-partita.
Ritratt: MFA
