Wirja reżiljenti u determinata minn Malta kienet biżżejjed biex jiksbu l-ewwel punt tagħhom fi Grupp B3 tal-Kwalifiki tal-Kampjonat Ewropew tan-Nisa ta’ taħt id-19-il sena tal-UEFA 2025 kontra l-Latvja.
Malta bdiet mill-aqwa tfittex li tippressa lill-Latvja għoli fil-grawnd.
Tmien minuti biss mill-bidu tal-logħba, Lara May Azzopardi, kellha x-xutt tagħha jintemm fir-rokna t’isfel tax-xibka biex tefgħet lil Malta fil-vantaġġ.
Wara l-gowl, il-Latvja fittxet li tieħu l-kontroll tal-partita, b’numru ta’ passes f’nofs il-grawnd, iżda tħabtu biex joħolqu xi opportunitajiet ċari ta’ skor.
Fit-18-il minuta, Malta resqu viċin li jirduppjaw l-iskor, hekk kif Ylenia Azzopardi, kellha x-xutt tagħha salvat tajjeb mill-goalkeeper tal-Latvja, Kristiāna Ustiņenkova.
Il-Latvja resqu viċin li jġibu l-iksor indaqs fil-35 minuta, meta Patrīcija Brazauska sparat xutt mix-xellug li ġie salvat b’mod eċċellenti f’corner mill-goalkeeper Maltija, Erika Muscat.
Wara l-mistrieħ, il-Latvja ħarġu ferm aggressivi u fit-48 minuta ġabu l-iskor indaqs meta Paula Dzene sparat xutt fir-rokna ta’ fuq tax-xibka li ma ta l-ebda cans lil Muscat.
L-iskor baqa’ ma nbidilx sa tmeim il-partita u konsegwentement, il-Maltin kisbu l-ewwel punt tagħhom fi Grupp B3.
L-aħħar partita tal-grupp ta’ Malta se tarahom jilqgħu lil Kazakhstan fis-Centenary Stadium it-Tnejn 7 ta’ April, bil-kick-off fil-11am.
Referee: Vanja Jankovic (Slovenja)
Ritratt: Joe Borg
