Għaxar proġetti u inizjattivi ta’ għaqdiet mhux governattivi kisbu finanzjament ta’ li jvarja bejn €3,000 u €10,000, biex sa Novembru li ġej, iwettqu proġetti u inizjattivi varji dwar il-vjolenza domestika u l-vjolenza abbażi tal-ġeneru.
Il-proġetti magħżula fil-programm ‘Together We Empower’ tħabbru waqt konferenza tal-aħbarijiet mis-Segretarju Parlamentari għall-Ugwaljanza Rebecca Buttigieg.
Is-Segretarju Parlamentari Rebecca Buttigieg qalet li dan il-programm ta’ finanzjament li jilħaq kważi mitt elf ewro se jkompli isaħħaħ is-sinerġija bejn il-kummissjoni u l-għaqdiet volontarji, waqt li se jsaħħaħ lill-kampanja kontinwa ta’ għarfien u impenn kontra l-vjolenza domestika.
“Il-ġlieda kontra l-vjolenza domestika hija prijorità għal dan il-Gvern u dan qed nuruh bil-fatti, hekk kif illum b’sodisfazzjon rajna kif numru ta’ NGO’s ibbenefikaw minn fondi li bihom jistgħu jagħmlu proġetti fil-komunità, biex iwasslu messaġġ komuni illi qatt bħala soċjetà ma nistgħu nkunu tolleranti lejn il-vjolenza domestika u għaldaqstant urejna li bħala Gvern konna smajna lil NGO’s, smajna il-karba tagħhom u għaldaqstant illum b’sodisfazzjon nidejna proġett li se jkollu impatt pożittiv fis-soċjetà.”
Rebecca Buttigieg, Segretarju Parlamentari
Il-Kummissarju dwar il-vjolenza abbażi tal-ġeneru u l-Vjolenza Domestika, Samantha Pace Gasan, qalet li l-proġett u l-inizjattivi li se jibbenefikaw min dan l-programm ta’ finanzjament, ikopru firxa wiesgħa ta’ oqsma u realtajiet li jmissu mal-vjolenza domestika.
